١٠حاجات لازم تاخد بالك منهم لو ناوي تشتري عربية مستعملة

12/11/2020

كتب: محمد إنسان

عزيزي القاريء أهلًا بيك..
لو ناوي تشتري عربية مستعملة أو بتفكر خلينا نشوف مع بعض إيه أهم الحاجات اللي تركز عليها وتاخد بالك منها كويس أوي عشان ماترجعش تندم ومن خلال تجربتي الشخصية اقدر اقولك:

1- أول حاجة ماتستعجلش! ماتستعجلش ماتستعجلش ماتستعجلش!.. الاستعجال هيخليك تشتري وخلاص وترجع تندم بعدين.. خد وقتك على الأخر واسمع واتفرج وقارن لحد ما تحس إنك مقتنع بنسبة مليون في الميه.

2- بعد كده هتبدأ تشوف إمكانياتك إيه؟ معاك كام حاليًا وأخرك كام وقت الشراء.. لإن ده اللي هيحدد نوع العربية اللي هتشتريها وحالتها وسنة صنعها.

3- بعد ما تحدد المبلغ هتبدأ تشوف الرينج بتاعك هيسمحلك تركب إيه؟ وتبدأ تحصر الإختيارات المتاحة ليك وتقارن بينهم

4- الخطوة الجاية بعد ما تستقر على الموديل المناسب للمبلغ اللي معاك هتدخل على كل جروبات نوع العربية اللي اخترتها وتقرأ عنها كويس جدًا جدًا.. تشوف مميزتها إيه؟ عيوبها اللي الناس كلها بتشتكي منها، أسعار قطع غيارها رخيصة ولا غالية؟ متوفرة ولا صعب تلاقيها وهكذا

5- والنصيحة الأهم.. لو لقيت إن فيه ناس كتير أجمعوا على عيب معين في عربية عجباك.. إبعد عنها يا صديقي عشان هيبقى في الأغلب عيب تصنيع ومش هتعرف تحله طول ما أنت راكب العربية طول حياتك

6- اما لو استقريت على عربية وقريت عنها ولقيت قطع غيارها متوفرة وصيانتها سهلة والدنيا في كل حاجة تمام.. ابدأ قارن الأسعار بقى وادخل على المواقع اللي بيتم عرض العربيات المستعملة عليها والجروبات الخاصة بالموديل اللي حددته..

7- بعد ما توصل لأفضل سعر مناسب للعربية هتبدأ تتكلم مع صاحبها وتحدد ميعاد للمعاينة.. وفي المرة الأولي هتروح تشوفها لوحدك أو بمصاحبة فني سيارات يعملك عليها كشف مبدأي ويقولك تستاهل السعر ولا لا

8- لو الدنيا تمام والفني قالك العربية كويسة والسعر مناسب.. هتتفق مع صاحبها على زيارة للتوكيل الخاص بيها.. في التوكيل هيطلعلك تقرير كامل عن حالة العربية وصيانتها وكل شيء فيها عشان تبقى مطمن 100%..


9- بعد خطوة التوكيل والتقرير اللي قالك إن كل حاجة تمام هتتفق مع صاحب العربية على وقت التسجيل وإتمام عملية الشراء والأفضل إنه يبقى فيه مكان عام وتكون واخد معاك حد وقت تسليم الفلوس لو هتشتري من حد ماتعرفهوش كويس.

10- أخيرًا.. اتأكد إن كل حاجة اتنقلتلك واعرف ميعاد تجديد رخصة العربية وهتعمل إيه في المرور الخاص بيها وماتسيبش حاجة متعلقة عشان ماتدوخش وراء المالك الأصلي بعدين وتفضل تحت رحمته.. 

Comments: