٦ حاجات لو حصلت.. بتخلي الراجل يهرب من أي علاقة

16/11/2020


عزيزي القاريء أهلًا بيك..
المتعارف عليه بالنسبة للرجل إنه بيدور على البنت الجميلة وبيهرب دايمًا لو مالقاش الجمال اللي في خياله.. ولكن الدراسات أكدت إن ده مش السبب الوحيد.. وأخرهم دراسة لأساتذة في معهد علم نفس التطوري في جامعة أنسبروك الألمانية.. أن الأفضلية للرجل تعود لسمة الذكاء وليس الجمال! أو أي صفة أخرى! ودلوقتي هنقول مع بعض حاجات غير "فقر الجمال" ممكن تخلي الراجل يهرب من أي علاقة.. والكلام ده من وجهة نظر "راجل"

 

1- الكدب.. الرجالة في الأغلب بيعانوا من قلة الثقة في أي شريك بيقابلوه في حياتهم.. المشكلة دي بتتحل معاهم مع الوقت بالثقة في الشريك اللي معاه من المواقف الحياتية اللي بيقابلوها سوا.. فلو حصل وشريكه كدب عليه الراجل بيفقد الثقة وبيهرب من أول مخرج يقابله.

2- قلة الاهتمام.. الراجل بيحب الاهتمام.. وبيتمسك بالست الحنينة.. اللي بيلاقي معاها راحته وبيحس بقيمته ووجوده من اهتمامها به.. فالطبيعي إنه لما بيلاقي قلة اهتمام يحس بفراغ بيخليه يهرب بمنتهى السرعة.

3- الاهتمام برجل آخر.. الغيرة وما أدراك ما غيرة الرجال.. وقت ما بيحس إنه غير كافي بالنسبة لشريكته بيبدأ يكرهها.. وبينسحب في أقرب وقت.

4- مشاركة الغير في تفاصيل العلاقة.. الرجالة مابتحبش الحوارات الكتيرة عكس البنات.. بيحب شريكته تحتفظ بسره وسرها.. ماتدخلش حد بينهم خصوصًا في الخلافات.. وبالذات الأهل لإن وقتها المشكلة بتكبر وبتاخد أكبر من حجمها لو كانت فضلت بينهم هما الاتنين.

5- السطحية.. الراجل بيحب الست المثقفة.. اللي ليها طموح وشخصية وبتسعى دايمًا للنجاح.. لو لقي شريكته سطحية مابتفكرش غير في اللبس والميك اب والخروج بيبدأ حماسه ناحيتها يقل.. على عكس لما يشوفها بتنجح وبتهتم بحاجات مهمة في حياتها.. بيتشد لها أكتر وأكتر

6- الشخصية المتسلطة.. المعروف عن الرجالة حب السيطرة! وأوقات بتلاقي راجل بيحب يشارك حبيبته قرارته وبيحترم رأيها.. لكن دائمًا وأبدًا الراجل مابيحبش ان شريكته تفرض رأيها عليه.. وده اللي بيخليه يهرب من الشخصية المتسلطة.. اللي بتبقى عايزة تسيطر على كل شيء ومابتخليش للراجل أي رأي 

Comments: