ملخص قصة لانفصال وصلح تامر حسني وبسمة بوسيل

16/11/2020

أعلنت الفنانة المغربية بسمة بوسيل على ستوري الأكونت الرسمى بتاعها على انستجرام من أيام انفصالها عن الفنان تامر حسني وقالت إنهم بدأوا تجهيز أوراق الطلاق، وبعدها بدقايق مسحت الستوري دي، وده كان بعد جواز استمر لـ 8 سنين و3 أطفال.

وقالت في الستوري "لكل الناس اللي بتبعتلي صور وفيديوهات لتامر وشايفة إنه مش بيعملي احترام سواء في صور أو فيديوهات، ياريت تبطلوا تبعتولي أي حاجة عشان مش فارق لي أي صور، وكمان أحب أعرفكوا إني إحنا بقالنا فترة منفصلين وبنحضر أوراق الطلاق، لو سمحتوا احترموا مشاعر كل حد فينا وبطلوا على الأقل تبعتولي أنا أي حاجة.. بالتوفيق للجميع"

وبعدها انتشرت الأخبار على السوشيال ميديا وبدأ الناس والصحف يتكلموا عن موضوع طلاقهم، وانتشر لتامر حسني فيديو كان ضيف في برنامج "صاحبة السعادة" لإسعاد يونس وهو بيتكلم على علاقته ببسمة بوسيل وبيقول إنها بتغيير عليه وعقلها صغير.

وانتشر فيديو كمان للفنانة المغربية جليلة وهي بتزغرط على أغنية بشرة خير بالتزامن مع انتشار خبر انفصال تامر حسني عن بسمة بوسيل لكنها خرجت بعد كده وقالت "حبايبي ومتابعيني رجاءا لا تقحمون اسمي مع أي شخص أياً كان، أنا بعيدة عن هالمواضيع فديتكم ولا اللي خص بأحد، يا ريت تطلعوني من هالموضوع بليز وبخصوص فيديوهات اليوم الفرحة اللي كنت فيها، لأني رح أكون أول وجه عربي لبراند عالمي باذن الله، حرفيا كنت فرحانة من قلبي وحبيت أسويلكم إياها مفاجأة والله يوفقني ويوفق الجميع يا رب"

وبسبب الكلام المنتشر على السوشيال ميديا صرحت بسمة بوسيل وقالت ""قل لشاتمك ومغتابك والمفتري عليك، سبحان الذي سخرك لحمل سيئاتنا كما سخر البهائم لحمل متاعنا"

وصرحت الفنانة أحلام على حسابها الرسمي على موقع تويتر وقالت "حيرجعوا بإذن الله ولو ما رجعوش حسافر مصر وأصالحهم وهم احراااار، تهديد ووعيد وبوكسات الاثنين وعلى فكره كل واحد يكتب للتاني حالاً بحبك وبسرررررعه وياويلكم اذا غضبت"

وبعدها خرج الفنان تامر حسني عن صمته ورد على الأكونت الرسمي بتاعه على انستجرام النهاردة الاتنين 16 نوفمبر 2020 عن طريق خاصية الستوري وقال "بسمة حبيبتي للاسف إنتي مافكرتيش كويس و سلمتي ودنك لشر السوشيال ميديا عشان كان تعليق كلامهم فارغ نسوكي انك عرفتيني وانا مشهور ودي طبيعة شغلي الي عرفتيني عليها وحبتيني بيها، إزاي وصلوكي للزعل والبعد فترة .. المهم انا مش هزعل منك ولا يرضيني زعلك انتي حبيبتي و ام ولادي .. انا ضهرك وسندك مهما حصل، بس اللي عايز اقوله لعل نكون سبب خير في توعية ناس كتير، ليه لما اي حد بيزعل من حد بيطلع يكتب عليه في السوشيال ميديا طب حتى يكلمه الاول ايه علاقة الناس بعلاقة شخصية بين اتنين ممكن تتحل في التليفون أو في زيارة رحيمة ما بينهم وياريتها مشكلة اصلا.. ربنا جعل ما بينا مودة ورحمة عشان كدا للاسف انتي عارفه ان في ناس في طبيعتهم حب خراب البيوت ومش هنخلص منهم بس انتي اللي هتخلصي من فكرة انك تسمعيهم، مع إنك ماكنتيش كده"

وكمل كلامه في ستوري تانية بعدها وقال "ياريتك تركزي مع طاقة الناس اللي دعولنا ودعوا لولادنا وفعلا انا بشكر كل الناس والفنانين اللى سعوا في الخير لينا.. وأنا واثق انك دلوقتى زعلانة انك كتبتي كدة.. هو تصرف متهور منك بس ولا يهمك مش عيب ان الانسان يغلط ويتعلم وأنا ياما علمتك ولسة هعلمك كان نفسي الكلام ده يكون بينا لكن انتي اشركتي الجمهور الكريم فكان لازم ارد هنا.. وبينا حب عالي وحياة كريمة وأولادنا و بيتنا أغلي ما فيها ربنا يخلينا ليهم ويخليهم لينا يارب.. متهورة بس بحبك"

وقالت بعض المواقع إن الخلاف اللي كان بين تامر حسني وبسمة بوسيل كان بسبب بعض الصور المفركة اللي سبب غضب بسمة بوسيل، وإن فيه ناس كتير حالياً اتدخلوا في الموضوع عشان ينهوا الخلاف.

ومن شوية ردت بسمة بوسيل على كلام تامر حسني اللي في الستوري ونشرت الستوري بتاعته عندها وكتبت عليها ""فعلا اتهورت.. بس عشان بحبك".

Comments: