كيف بدأت البقلاوة.. اعرف قصتها وطريقة عملها في البيت

16/11/2020

كل واحد مننا عنده صنف معين حلو بيحبه وبيعتز بيه في الحلويات الشرقية، يمكن تكون البقلاوة من ضمنهم ويمكن لا، بس صعب تلاقي شخص مابيحبش البقلاوة أو بيقول إنه مالوش فيها، وده لإن البقلاوة هي عبارة عن جلاش عليها سكر أو عسل وجواها مكسرات زي الفستق أو الكاجو.

وزي أغلب الحلويات الشرقية اللي ليها قصة لاختراعها، البقلاوة كمان ليها قصة وبيتقال إن اسمها مشتق من اللغة التركية ودخلت الكلمة في اللغة الانجليزية سنة 1650،وفيه أقاويل تانية بتقول إن الأسم مشتق من اللغة الفارسية والكلمة أصلها "باقلبا"، ولكن قاموس "هانز فير" بيقول إن التأصيل الشعبي لكلمة بقلاوة العربية جايه من كلمة "بقوليات" بسبب دخول الفول السوداني في مكوناتها وممكن تكون مشتقة من كلمة "بايلاو" ومعناها في اللغة المنغولية الربط واللف.

 وبيتقال إنها بدأت تتصنع في عصر الدولة العثمانية  في القرن الـ 17 وبالذات في قصر "توبكابي" في نص شهر رمضان كل سنة، وكام فيه موكب اسمه "موكب البقلاوة" وكان بيخرج فيه الجنود الانكشاريين ومعاهم صواني بقلاوة من قصر السلطان لسكنهم، وكل 10 جنود بيبقى معاهم صنية بقلاوة.

وفيه قصص بتقول إن البقلاوة إن البقلاوة اتسمت بالأسم ده نسبة لمران السلطان التركي اللي طلب من مراته إنها تعمل له صنف حلاويات مختلف ماحدش داقه قبل كده، فجابت رقائق جلاش وحطت فيها حشو مكسرات وسقتها بالعسل، وكان طعمها حلو جدا، ولما عجبت السلطان سماها على اسم مراته كتكريم ليها.

وبعض الروايات الأخرى بتقول إن السلطان العثماني عبد الحميد كان عنده طباخة اسمها "لاوة" وهي اللي عملت البقلاوة لما طلب منها السلطان تعمله حاجة حلوة جديدة ماحدش كلها قبل كده، فجابت "لاوة" الجلاش وحطيت بين طبقاته مكسرات وحطيت عليه سمنة وسابته في الفرن وبعدها حطت عليه عسل، ولما داقه السلطان لأول مرة قال لضيف عنده "باق لاوة" أو باللغة التركية "Bak" يعني انظر أو بص، فمعني الكلمة "بص لاوة" فيما معناه بص لاوة عملت إيه، فاتسمت باسم "بقلاوة" على بعض.

وبعد كده دخلت البقلاوة بلاد الشام وانتشرت وبقيت واحدة من أكتر الأكلات السورية انتشاراً وبيتقال إن الفضل في انتشارها في سوريا بيرجع لشخص اسمه "فريج" وهو شخص أصله تركي كان عايش في حلب من أكتر من 100 سنة وكان فاتح هناك دكان بيبيع بقلاوة في رمضان، ولكن انتشرت وزاد الطلب عليها فبقيت تتباع طول السنة.

وبعد ما انتشرت في بلاد الشام ضاف عليها السوريين واللبنانيين نكهات شرقية في الحشو أكتر، واتألف كمان عنها ومنها روايات "2014 The Baklava Club: A Novel" و " Sweet Baklava".

لو ريقك جري وحسيت إن نفسك دلوقتي في بقلاوة وإنت بتقرا الموضوع ده.. اعرف طريقة عمل البقلاوة:

المقادير:

1- لفة جلاش

2-  ملعقة كبيرة من السكر

3- ملعقة كبيرة من القرفة

4-  مكسرات مشكلة ومطحونة، زي : البندق، واللوز، والجوز -حسب الرغبة-.

5- سمن للدهن.

مكونات العسل:

1- كوبايتين مياه بنفس درجة حرارة الغرفة.

2-  كوبايتين سكر أبيض.

طريقة تحضير العسل:

اخلطي السكر مع المياه في حلة مناسبة، وحطي الحلة على نار متوسطة لحد ما تغلى وسبيه لدقائق لحد ما يبقى قوامه سميك، وسيبى العسل لحد ما يبرد.

طريقة تحضير البقلاوة: 

اخلطي مكونات الحشو اللي هي المكسرات المطحونة مع السكر والقرفة كويس، وسبيها على جنب وبعدها ادهني صينية خبز مستطيلة بالسمنة، وافردي ورق الجلاش، وقطعيه لنصين،وبعدها غطي الورق بقطعة قماش رطبة عشان ماينشفش.

وخدي ورقة من الجلاش، وادهنيها بالسمنة، وافردها بحيث تبقى الناحية العريضة من قدام، وبعد كده طي الحشوة جواها على شكل خط، ولفيها على شكل صوابع رفيعة. 

وحطي صوابع الجلاش الملفوفة في الصينية، وادهنيها بالسمنة، وقطعي صوابع الجلاش بعد ما تحطتيها  في الصينية، قبل ما تدخليها الفرن، وخلي بالك إنك تحمي الفرن فترة قبل ما تحطي الصنية فيه على درجة حرارة 180 مئوية لمدة وسبيها لمدة عشرين دقيقة، أو لحد حتى ما تحمر ويبقى لونها دهبي. 

واخيراً صبي عليها العسل وهي ساخنة.

Comments: