أسباب هتقولك ليه شكلك في المرايا أحلى من الصور

18/11/2020

كتب: محمود عادل

أكيد في أكتر من مرة حسيت إن شكلك أحلى في مرايا الحمام أو مرايا الجيم أو أي مرايا موجودة في أي مكان ولما بتاخد صورة بتتخد من شكلك.. فا النهادرة هنحاول نبسط الموضوع ونقولك على حاجات تظبطها وأنت بتاخد صورة عشان تطلع حلوة زي ما بتشوف نفسك حلو في المرايا.. والأهم من كل ده إننا حلوين في كل الأوقات والأحوال ولكن عملنا الموضوع ده عشان نفسره

موقع brightside بيدينا أسباب للموضوع العجيب ده وهي: 

المراية: اللي إحنا بنشوفوا فيها هو إنعكاسنا وإحنا عشان بنبص لنفسنا كل يوم ده إذا مكنش أكتر من مرتين في اليوم فإحنا اتعودنا على شكلنا بس أنت مش بتتصور كتير فلما بتتصور كل فين وفين بتلاقي شكلك مختلف وده شكلك الحقيقي مش شكلك المعكوس.. إهدى ومتتخضش.

سهل تغير في شكلك في المرايا: بمعنى إنك في المرايا لما مش بتعجبك الزاويا اللي باصص فيها لنفسك بتبدء تلف وتشوف نفسك من الجمب اليمين والشمال وبتفضل تلف لحد ما توصل للوضع اللي شكلك حلو فيه، بس في الصور أنت بتشوف نفسك بعد ما بتاخد الصورة، ولذلك حاول تكتشف إيه أحسن وضع أو جانب تقدر تاخد بيه صورة لأن لكل البني أدمين بيتخلفوا عن بعض، في واحد بيحب يتصور من الجنب اليمين وواحد تاني من الشمال وهكذا بقى.

النور مهم جدا: لما بنبص للمرايا دماغنا بتوازن النور حتى لو في اختلافات في الإضاءة، بس الكاميرا مش بتقدر تعمل كدة ولذلك النور مهم في التصوير عموما عشان يطلع صورة كويسة من غير أي نغبشة كمان.

التكافئ: لما بنبص في المرايا فإحنا بنبص من زاوية أو زوايا معينة من وشنا، لكن لما بنتصور الموضوع يختلف.

المكان بيختلف: لما بنبص في المرايا فا إحنا بنبص عادي لشكلنا أو بنطمن إن كل حاجة مظبوطة قبل ما نخرج ولكن لما بتتصور فا أنت بتكون عايز تاخد أفضل وضع ليك في الصورة فبنعمل حاجات غريبة بتطلع شكلنا غريب، زي بوز البطة ونقول تشييييييييز أو تفرد نفسك أو تشفط كرشك والحاجات دي كلها مصطنعة فتبطلع صورة مش حلوة.

التركيز على أجزاء معينة: لما بنبص للمرايا فا إحنا بنبص على شعرنا الأول بس ونشوف مظبوط وبعدين نبص دقننا ونشوف متحددة وتمام ولا لا أو عينيك أو مناخيرك، بس الحالة الوحيدة اللي بنشوف فيها كل دول مرة واحدة دي الصورة ولذلك لما بتبص مرة واحدة بتستغرب وبتقول لنفسك "أنت مين" بصوت محمد رمضان.

كل الناس متخيلة إنها جذابة حتى لو مش كدة: دراسة في جامعة شيكاغو اكتشفت ده، فجابوا صور ناس وعملوها في أحسن إيديت ونفس الصور في أوحش إيديت وطلبوا من أصحاب الصور يطلعوا أصل الصورة والمفاجأة.. إنهم فشلوا في اختيار الصورة الأصلية واختاروا الصور المعدلة في أحسن شكل.

طيب إزاي نطلع صور راضيين فيها عن شكلنا؟ موقع sorelleamore بيديك نصائح وهي:

- حاول تشوف أفضل وضع ليك تتصور فيه

- إلبس الحاجات المناسبة لشكل جسمك

- الألوان بتفرق ولذلك شوف الألوان المناسبة للون بشرتك

- الزوايا  بتفرق بردو فحاول تكتشف أفضل زاوية لوشك وجسمك

- حاول دايما تتصور في إضاءة كويسة 

- ساعات العيب بيكون في الكاميرا، فا كل ما الكاميرا كانت أفضل هتطلع صورة أفضل وبعزل أحسن وبتطلع كل التفاصيل

Comments: