تزويد آخر زرافة بيضا في العالم بجهاز GPS لحمايتها 

18/11/2020

العالم كان فيه نوع من الزرافات وبدأ يدخل في منحنى الانقراض وهو الزراف الأبيض، ولكن الصيادين ماحفظوش على النوع ده من الانقراض واستمروا في صيده، واتبقى آخر زرافة بيضا في العالم وهي في كينيا، وعشان يحافظوا عليها زودوها بـ GPS  عشان يحموها من الصيادين.

وقالت منظمة "Ishaqbini Hirola Community Conservancy" إنها زودت الذكر بـ GPS بعد ما تم قتل أنثى الزرافة وطفلها في مارس اللي فات بعد ما اصطادهم الصيادين ولقوهم على هيئة هيكل عظمي في غاريسا في شرق كينيا .

 وقالت المنظمة إن الـ GPS في قرون الزرافة، وإنهم بيختبروا اتصال الجهاز كل ساعة عشان ينبهوا الحراس لمكانها.

وقال "محمدأحمد نور" مدير محمية "إيسحاقبينى هيرولا "وقت الوفاة إن قتل الزرافة كان بمثابة ضربة قوية ليهم سواء كان بالنسبة للسياحة وللبيئة والخطوات اللي خدها المجتمع عشان يحافظ على الأنواع النادرة والفريدة من نوعها، وإن دي خسارة طويلة المدى بالنظر للدراسات والبحوث الجينية اللي كانت استثمار كبير في المنطقة من الباحثين.

الجدير بالذكر إن اللون الأبيض اللي بيخلي الزرافات البيضا هي نادرة جدا هي سمة وراثية معروفة باسم "اللوسيزم"، و"اللوسيزم" هو حالة بيحصل فيها فقدان جزئي في التصبغ وده بيؤدي لتلون الزرافة باللون الأبيض أو الشاحب أو لون غير مكتمل للشعر والجلد أو القشور ولكن مابيأثرش على العين، وهو على عكس البهاق، لإنه ناتج من انخفاض في أنواع كتير من الصبغات، مش الميلانين بس.

Comments: