المُشاهد: فيلم "الصندوق الأسود".. تمثيل قوي وحاجات أول مرة تتناولها السينما!

18/11/2020

دخلنا فيلم "الصندوق الأسود" في السينما اللي من بطولة منى ذكي ومحمد فراج ومصطفى خاطر وقررنا نحكيلكم عنه شوية ونقولكم بعض الملاحظات اللي خدنا بالنا منها!

نبدأ بالكلام عن "محمد فراج" اللي قدر يقنعك بدور "سيد الهجام" اللي عنده سوابق إجرامية، والدور كان جريء بإنه عمل دور واحد عنده "فيتيش" للسيدات الحوامل.. وده موضوع مش بيبقى عند كل الناس الجرأة إنها تتناوله في السينما والأفلام!

وطبعاً خدنا بالنا من الشكل اللي طلع بيه بعين مشوهة ومخيفة وعين تانية سليمة لكنها ماتخلاش من الرعب هي كمان، وكان باين لمسات الماكيير "محمد عبد الحميد" في التشوهات اللي في وش "فرّاج" وكمان في شكل بطن منى ذكي في أحد المشاهد وهي حامل، واللي عادة بطن الحوامل بتتعمل بشكل مش دقيقي في الأفلام المصرية والمسلسلات.

وبالكلام على دقة "مشهد الحمل" فده مش جديد على منى ذكي، فهي عملته برضو بشكل دقيق في فيلم "سهر الليالي" ويمكن ده مش صعب عليها لأنها مرت بيه في حياتها الواقعية، لكن هنا في دور "ياسمين" كانت أم بتعاني من حمل صعب وبتتعرض في أحد المشاهد لمطاردة عنيفة مع اتنين لصوص.. فبتعيش معاها لحظات الرعب في كل مشهد!

أما بقا "مصطفى خاطر" فقدر يثبت إنه مش بس ممثل كوميدي شاطر، بل هو ممثل يقدر ينقنعك في أي نوع بيؤديه، وفي "الصندوق الأسود" عامل دور شاب عادي زي أي شاب، متردد ومتلخبط في مشاعره وقراراته، لكن حياته بتتشقلب أول ما الظروف تخليه يبقى متورط في عملية سطو.. وبتشوف هل هيخرج منها؟ ولا هيبقى ضحيتها!

زي ما فيه أفلام يوم واحد وأفلام المشهد الواحد، الفيلم ده كل أحداثه بتدور في مدة زمنية قصيرة وهي 12 ساعة، والنوع ده من الأفلام بيشد انتباه المشاهد مع كل دقيقة بتمر من الأحداث، وبيخليك مش عايز الوقت يعدي لحد ما الضحية اللي انت متعاطف معاها تنقذ نفسها أو حد ينقذها، وقدر يحطنا في الحالة دي المخرج الموهوب "محمود كامل"!

"مفيش مفر" هي جملة هتيجي في بالك وانت بتتفرج على الفيلم، خاصة انه بيدور في مكان واحد وهو البيت الكبير، هتحس إنك مش لاقي له مخرج وإنك محاصر جواه.. بشكل يخلي البيت لوحده بطل من أفلام الفيلم!

اتفرجوا على الفيلم، وابعتولنا قولولنا رأيكم فيه!

Comments: