اعرف إيه هم "خمس لغات الحب".. وجاوب عالأسئلة وشوف لغتك إيه؟

19/11/2020

في كتاب للكاتب ومقدم البرامج الأمريكي "غاري تشابمان"  إسمه "لغات الحب الخمسة" أصدره  للمرة الأولى سنة 1992، وبعدها تم إصداره بنسخ مختلفة في السنين اللي بعدها

فكرة الكتاب إن الحب له خمس لغات أو خمس طرق في التعبير عنه وكل شخص مننا بيكون له لغة أساسية في التعبير عن الحب من الخمس لغات.. ولغة تانية ثانوية أو فرعية ولما الإنسان بيقدر يحدد لغته الأساسية  ده بيسهل عليه في التعبير عن حبه أو تقديم طريقة الحب المناسبة لشريكه

لغات الحب اللي حددها غاري كانت

الأولى: التواصل الجسدي

الطفل في أول حياته بتبقى طريقة تعبيره واستقباله للحب  بينه وبين أمه هو التلامس الجسدي وبيستمر ده لفترة لحد ما بيبدأ إدراكه يتشكل، وبعدها بيكتشف طرق الحب التانية، في ناس بتفضل أفضل طريقة للتعبير عن الحب بالنسبالها هو التواصل الجسدي بكل أشكاله بداية من إنه ييجي يقعد أو يتواجد قريب منك عمومًا، لحد الطبطة ومسك الإيد والأحضان ودي بتبقى الطريقة اللي بيقولوا بيها "بحبك" و"أنا موجود"

الثانية: وقت خاص ليكوا

في لغة الحب دي بيبقى طريقة التعبير هي "الوقت" إن اللي قدامك يخصص وقت ليك، تعملوا فيه أي نشاط بتحبوه أو حتى لو مش هتعملوا حاجة محددة، بس فكرة إن الوقت ده هيكون ليك واللي قدامك هيضحي بأي حاجة تانية أو هيلغيها عشان  يقضي معاك وقت، ويشاركك اي حاجة بتحبها أو يسمعك أو بس لمجرد إنه يشوفك

الثالثة: كلمات التشجيع والتقدير

"برافو" و "أنا فخور بيك" و" شكلك حلو" و "وحشتني" و "بحبك"، الكلمات اللي بتعبر عن الحب والتقدير والدعم، دي ممكن تبقى الطريقة للتعبير عن المشاعر، وفي ناس بتعتبر كلام زي ده هو اللي بيحسسهم فعلًا إن اللي قدامهم بيحبهم ومهتم بيهم وبيفكر فيهم طول الوقت

الرابعة: الهدايا

إن يجيلك هدية حتى لو وردة من فترة للتانية ومش عشان مناسبة معينة، بتبقى لناس كتير دليل على الحب والإهتمام وبتحسسهم بالأمان
والهدية مش بتبقى بقيمتها المادية، بس بتبقى تعبير على إن الشخص بيفكر فيك وكمان عارف إيه اللي بتحبه وعنده استعداد يجيبه ليك لمجرد إنه يخليك مبسوط

الخامسة: التعبير العملي (الأفعال)

وده بيحصل لما الطرف التاني يساعدك في حاجة إنت محتاس فيها، يخلص معاك شغل، يذاكرلك، يروح معاك مشوار مهم،  أو يعمل بدالك مشوار مهم إنت مش قادر تعمله، في الحالة دي هو مش بيتكلم هو تصرفاته هي اللي بتوصل المعنى والشعور اللي بيكنه ليك وهو "الحب"

مفيش حد فينا عنده لغة واحدة للحب، كل الناس جواها اللغات الخمسة للحب بس بنسب متفاوتة، بس محتاج تعرف إيه اللغة الأقوى عندك أو اللغة الأساسية بالنسبالك وبالنسبة لشريكك، عشان ده هيسهل عليكوا في التواصل وإنكوا تبقوا عارفين إيه اللي محتاجينه من بعض وإيه طريقة التعبير عنه

في الموقع ده هتلاقي "كويز" لما تجاوب عالأسئلة هيقولك إنت إيه نسب لغات الحب بالنسبالك وإيه لغتك الأساسية، الكويز ده مش بس للمرتبطين في نسخة منه للسناجل، ونسخة للأطفال ونسخة كمان للمراهقين

جرب واعرف إيه لغة الحب بتاعتك، ولو مرتبط ابعت لشريكك، ولو سينجل اتوكل على الله وابعت للكراش كده. ونسأل الله التساهيل يعني! 

Comments: