بقلم أهلاوي متعصب.. أوقفوا ما يحدث مع شيكابالا حتى وإن كان هو من تسبب فيه!

29/11/2020

عزيزي القارئ أهلًا بيك..

خلينا في البداية نقول حقيقة مؤكدة كلنا عشناها ومرينا بيها.. وهي إن أجواء الاحتفال أو بالمصطلح الدارج والأدق "التحفيل" جزء كبير جداً من متعة كرة القدم.. وأكيد أنت نفسك عزيزي القارئ قمت بيه من قبل وكنت مستمتع ومبسوط وأنت "بتحفّل" على الفريق المنافس ليك وبتستلذ لما بتشوفه خسران سواء منك أو من أي فريق تاني..
ولكن..
فرق كبير بين الاحتفال والتحفيل والمبالغة في الفرحة وبين تخطي كل الحدود والأصول والتقاليد والذوق والأدب.. وهذا ما يحدث مؤخرًا مع شيكابالا وللأسف الشديد وقعت قلة غير مسئولة من الجماهير في ارتكاب أخطاء جسيمة وتخطت كل الخطوط الحمراء.
إيه اللي بيحصل؟ وهل شوفنا ده قبل كده؟ وإزاي النجوم بيتصرفوا لما الجماهير بتشتمهم؟ وهل الوقائع السابقة تشبه واقعة شيكابالا؟!

- إيه اللي بيحصل؟..
إن لاعب نادي الزمالك شيكابالا دخل في صراعات كتير مع جمهور الأهلي.. وبينهم أكتر من سابقة، ومحدش قادر يحدد مين اللي بدأ.. هل شيكابالا استفز جماهير الأهلي فاعتادوا يشتموه كل ماتش؟ ولا جمهور الاهلي اللي بدأ بمعاداة شيكابالا وبالتالي الاستفزازات اللي بيعملها فيهم والإيحاءات الجنسية ورفع الحذاء تجاههم كان رد فعل منه على عنصريتهم عليه!

- هل شوفنا ده قبل كده؟..
الإجابة أيوه طبعًا أكتر من لاعب من الفريقين سواء الأهلي ولا الزمالك كانوا بيتشتموا من الجمهورين.. وعلى سبيل المثال لا الحصر.. عماد متعب - حازم إمام - أبوتريكة - حسن شحاته - حسام وابراهيم حسن وغيرهم من النجوم..

- إزاي النجوم دول اتصرفوا لما الجماهير كانت بتشتمهم؟..
الغالبية العظمى مكانتش بترد الإساءة وبتتجاهلها.. فبالتالي الموضوع ماكنش بيكبر وبيتلم والجمهور بينسى والدنيا بتمشي.. وآخرهم شتيمة عماد متعب والخوض في عرضه.. ولكن كان فيه بعض اللاعيبة مابتقدرش تسكت وبترد على الجماهير زي حسام حسن وابراهيم وأخرهم شيكابالا

هل الوقائع السابقة تشبه واقعة شيكابالا؟!
الإجابة بمنتهى الأمانة: لا! الموضوع المرة دي عدى كل الحدود والخطوط الحمراء.. سواء كان شيكابالا بدأ بالغلط أو لا.. سواء كان شيكابالا رفع الحذاء بالفعل في وجه جمهور الأهلي أم لا.. سواء كان قام بحركات فيها إيحاءات جنسية أو لا.. كل ده مش مبرر أبدًا إنك تقتحم حرمة الأموات وتروح لمقابر عائلته تصور فيديو مشين.. مش مبرر انك تجيب كلب وتوصفه به! لا أخلاق ولا دين ولا أصول ولا تقاليد ممكن تبرر وتبيح ده!.. أرجوكم أوقفوا ما يحدث قبل أن تتطور الأمور وتصل لكوارث واحتقان ودماء بين جمهور الفريقين!

 

Comments: