في يومه العالمي.. ما هو الإيدز؟ وأفلام قصصها عنه

01/12/2020

كتب: محمود عادل

يوم 1 ديسمبر، يوم عالمي للتضامن مع مرضى الإيدز، الهدف من اليوم ده هو إن الناس تتحد وتظهر الدعم للأشخاص المصابين بفيروس نقص المناعة المكتسب أو الإيدز، وكمان عشان نفتكر كل الناس اللي فقدوا حياتهم بسبب المرض ده.

وطبعا زي ما أنا معودكم إحنا بنحب نتكلم بشكل علمي، فحسب منظمة الصحة العالمية، ما هو فيروس نقص المناعة البشرية أو الإيدز؟

الفيروس بيصيب الجهاز المناعي اللي بتساعد الجسم على التصدي للعدوى، ويبدأ يتناسخ الفيروس جوا الخلايا فبيصيبها ويدمرها، ومع غياب العلاج الفعال، الجهاز المناعي بيبقى ضعيف جدا ومبيقدرش يحارب أي عدوى أو مرض.

طيب الشخص بيصاب بالمرض خلال قد إيه؟

لو شخص مش بياخد العلاج المضاد للفيروسات القهقرية، بيبدء يظهر في خلال 5 لـ 10 سنين وممكن أقل من كدة، وأحيانا الفيروس بينتقل خلال 10 سنوات لـ 15 سنة وممكن تزيد كمان عن كدة.

طيب بينتقل إزاي؟

في أسباب كتير لانتقال الفيروس زي:

- ممارسة الجنس من غير أي حماية

- عمليات نقل الدم الملوث

- وتبادل استخدام الإبر وأدوات الحقن ومعدات الجراحة

- وأحيانا بينتقل من الأم المتعايشة مع الفيروس لطفلها خلال الحمل أو الولادة أو الرضاعة

ولذلك لو الشخص المتعايش مع الفيروس بياخد المضادات اللي بتقلل حدة الفيروس، بتخلي فرص إنتقاله من شخص للتاني أقل بنسبة كبيرة.

الموضوع يطول شرحه عن كدة بس ده كل اللي محتاجين تعرفوه عن المرض، وقبل ما أقولكم أفلام تشوفها بتتكلم عن مرض نقص المناعة، حابب أقول رأيي في الموضوع

وهو إن في العالم العربي تقريبا كله، أي شخص مصاب بفيروس الإيدز بيتم وصمة بالعار وبيكون منبوذ ومكروه، وده شيء بغيض لأقصى درجة ممكنة، الشخص المصاب بيمر برحلة صعبة محتاج فيها الدعم والتقدير أفضل من إنه يعامل كشخص منبوذ والناس كلها بتجري منه، والحتة اللي جاية دي ممكن تبقى كليشية قديم بس هي حقيقة، وهي إن لو عايزين فعلا العالم ده يكون مكان أمن ليك ولأسرتك وولادك في المستقبل لازم نطمن بعض ونساعد وندعم بعض.. أنت نفسك في يوم من الأيام وبعد الشر عليك ممكن ينتقلك المرض اللعين ده عن طريق نقل دم ملوث أو إبرة غير معقمة أو أي سبب تاني.. حطوا نفسكم مكان الناس قبل ما تحكموا عليهم!

فيلم "أسماء"

الفيلم اتكلم عن قصة "أسماء" البنت اللي بتعاني من المرض ومحتاجة عملية عشان تنقذ حياتها، وبتبذل كل جهدها عشان تخفي المرض عن اللي حواليها، هند صبري في الفيلم ده قالت جملة مهمة جدا بتلخص رسالة صناع الفيلم وهي: "أنا لو مُت مش هموت بالمرض، أنا هموت من المرض اللي عندكم".

فيلم Dallas Buyers Club

الفيلم بيتكلم عن "رون وودروف" اللي بيكتشف إصابته بمرض الإيدز وقدامه 30 يوم ويموت ومش قادر يتحمل تكاليف العلاج، بيكتشف إن في دواء محظور ممكن يساعد مرضى الإيدز على إنهم يعيشوا بشكل أطول فبيبدأ يهربه عشان يساعد نفسه ويساعد غيره من المصابين، الفيلم عن قصة حقيقية وحقق إيرادات 55 مليون دولار رغم إن ميزانيته كانت 5 مليون وكمان "ماثيو ماكونهي" فاز عنه بالأوسكار.

Comments: