٦ حقائق عن الشوكولاتة.. السابعة ستبهرك

01/12/2020

كتب: محمود عادل

الشوكولاتة... تعتبر أهم منتج عرفته البشرية "ده تصريح جدعنة من عندي عشان بحبها بس" وأغلب الناس بتحبها في أشكالها المختلفة، وده خلى ذهني يخبط فيه سؤال مهم جدا، هل هي صحية ولا لا؟

موقع bhf بيقولك حقائق منتشرة عن الشوكولاتة غير حقيقية، والموقع مش بيقولك هي صحية ولا مش صحية، هو بيجاوب على بعض الأساطير المنتشرة بحقائق مؤكدة:

1- الشوكولاتة حلوة

في بعض الأبحاث بتقول إن الكاكاو فيه مادة اسمها "البوليفينول" بتعمل على خفض ضغط الدم وفيها خصائص مضادة للأكسدة، وفي دراسة اتعملت في يوليو 2020 من كلية "بايلور" للطب في ولاية تكساس الأمريكية بتقول إن أنها بتساعد على صحة الأوعية الدموية للقلب بس الدراسة دي مخدتش في عين الاعتبار أي عوامل تانية زي نوع الشوكولاتة والكمية وأي حاجة تانية.

الشوكولاتة فيها نسبة كبيرة من السكر والدهون المشبعة والإفراط فيها بيزيد الوزن وده بالتالي هيؤدي للإصابة بأمراض القلب والأوعية الدموية

ولو على البولفينول اللي فيه خصائص مضادة للأكسدة، ده هتلاقيه في البقوليات والفواكه والخضروات.

2- الشوكولاتة بتديني طاقة

الناس بتتخدع في الحتة دي لأن الشوكولاتة فيها نسبة كافيين ولكن للأسف هي قليلة جدا، فا الأفضل تأكل وجبة خفيفة زي تفاحة أو حتة توست ظريفة.

3- الشوكولاتة الدارك حلوة وصحية

ده تمام وهيرجعنا لأول نقطة وهي مادة "البوليفينول" ولكن خلال عملية التصنيع بتحصل خطوات كتير وكمان بيتم إضافة مواد جدعنة زي السكر وكل الخطوات دي ممكن أصلا تشيل المادة دي من الشوكولاتة وكدة أنت في النهاية بتأكل شوكولاتة عادية.

4- حتة شوكولاتة صغيرة متعملش حاجة

القطعة الواحدة فيها متوسط 250 كالوري وده 10% من اللي بتحتاجه في يومك، بدل ما تأكله في وجبة خفيفة تسد جوعك لا بتأكله في بار شوكولاتة ممكن ترفعوا على بوق واحد، لا ومش بس كدة بوشكاش محفوظ بيضحي النهاردة، أنت عايز تفقد الكالوريز اللي دخلتها جسمك من البار ده، كشخص بالغ عمره 50 سنة هيحتاج يمشي من 45 لـ55 دقيقة.. كل ده كان ليه؟ عشان لوح شوكولاتة صغير!

5- مفيش حاجة اسمها تبطيل أنا مدمن شوكولاتة

مفيش أي دليل على إن الشوكولاتة بتقلب إدمان، إحنا بس قلبناها عادة، يعني بنجيبها واحنا فرحانين مثلا أو بعد يوم شغل طويل نكافئ نفسنا، فا لا هي مش إدمان ولا حاجة يا أبو عمو هو مجرد إحساس بإنك عايزها.

6- مرضى السكر مينفعش يأكلوا شوكولاتة

ممكن مرضى السكر يأكلوا شوكولاتة ولكن ولكن ولكن "بإعتدال" وضمن نظام غذائي صحي، فلو هتأكلها، خليها كمية قليلة جدا وفي نهاية وجبتك عشان جسمك يمتصها تاتا تاتا وبالراحة!

وفي النهاية هو كلام علمي يحترم وكل حاجة بس إحنا هنأكل شوكولاتة عادي وأنا هجيب واحدة دلوقتي، بس بردو باعتدال يا ولااااااااد وكل حاجة في الحياة باعتدااااااااال يا ولاد!

Comments: