دراسة: البنات أذكى من الولاد في عالم الفيديو جيمز

02/12/2020

كتب: محمود عادل

الموضوع ده عن الجيمينج والجيمرز بكل أنواعهم حتى اللي بيلعبوا بالموبايل "رغم إني مش بشوفهم جيمرز" فلو أنت منهم أعتقد هيهمك جدا ولو أنت مش منهم كمل قراءة جايز تطلع بمعلومات مفيدة. 

نشر موقع Royal Panda دراسة قام بيها مع عدد من الخبراء الأكاديميين على أكتر من 1000 شخص بيلعب فيديو جيم باستخدام المنصات المختلفة.

الأسئلة كانت بهدف قياس نسبة ذكاء كل شخص بيستخدم جهاز معين، يعني قياس نسبة ذكاء شخص بيلعب بالـPC أو PS أو Xbox أو بالموبايل.

والأسئلة تم تصميمها عشان يقيسوا 4 علامات رئيسية للذكاء زي الذكاء اللفظي والقدرة الرياضية والتفكير المنطقي والاستدلال المرئي 

المهم إن ده وصلنا لنتائج مهمة وظريفة هنحاول نحطها بشكل ظريف ومنسق لإن الدراسة دسمة وبسمسم.

نسبة الذكاء حسب الجهاز المستخدم:

- PC Gamers - 112.3 IQ

- PS4 Gamers - 110.7 IQ

- Xbox Gamers - 103.8 IQ

- Nintendo Switch Gamers 101.3 IQ

- Mobile Gamers - 99.4 IQ
 

مستوى الذكاء من اختيار اللعبة:

لاعبي Rainbow Six Siege من خلال كل المنصات المختلفة هم الأذكى في عالم الألعاب بعد ما عملوا سكور 120.3 IQ ومن بعدها Among Us بنتيجة 118.9 IQ وبعدها Minecraft بنتيجة 116.3 IQ وفي بعدها Call of Duty Modern Warfare بنتيجة 111.2 IQ ومن بعدها Fifa و Fall Guys و Animal Crossing و Fortnite و The Sims و Mariokart و GTA Online و Assassin's Creed و Rocket League و Candy Crush Saga و أخيرا Angry Birds بأقل نسبة ذكاء 95.8 IQ

وكان في جدل حوالين أنواع الموبايلات، عشان منزعلهمش بردو الدراسة اهتمت بيهم، فا قالت الدراسة إن مستخدمين أندرويد هم أكتر ذكاء من مستخدمين الـ iPhone.

ومن حيث النوع، وهنا بقى خد التقيلة، الأناث طلعوا أذكى من الذكور في عالم الجيمينج!

Comments: