ما هو الوسواس القهري أو الـOCD؟ وجوانب إيجابية عنه

09/12/2020

كتب محمود عادل: 

أنا قفلت باب الشقة؟ أنا نسيت إزاز العربية مفتوح؟ أنا حاسس إن الشقة مش نضيفة سيكا! لو في دماغك أفكار غريبة أو بتقعد تكرر الأفعال أو تغسل إيدك كتير كتير كتير كتير كتير!

ده في العلم بيسمى الوسواس القهري أو الـOCD، طيب خلونا نتكلم بشكل علمي أكتر لأن أنا راجل كريكتور.. مج القهوة الجميل عشان الموضوع كبير ودسم وبسمسم! 

https://media1.tenor.com/images/062442f2fce93fc3cfccf0b373005073/tenor.gif?itemid=6117572

حسب موقع الكلية الملكية للأطباء النفسيين، الوسواس القهري بيتكون من 3 أجزاء مهمين ورئيسيين وهما:

- الأفكار اللي بتخليك تعيش في حالة قلق 

- القلق اللي بتحس بيه

- الحاجات اللي بتقوم بيها عشان تتخلص من القلق 

طيب زي إيه الأفكار دي؟ 

- خايف تكون مش نضيف أو مصاب بأمراض خطيرة ودي أفكار في مخك

- بتتخيل نفسك بتقوم بأعمال مش من طبيعتك زي القتل وأنت متأكد إنك عمرك ما هتعمل حاجة زي دي ودي بتبقى صور في مخك بتتخيلها

- بتجيلك شكوك إن تكون تسببت في أذى لحد، أو إنك سبت باب الشقة مفتوح 

- بتقعد تكلم نفسك في عقلك طول الوقت

- بتتضايق لو السفرة مش متوضبة كويس أو حد حرك حاجة من مكتبك وأنت ظابط كل حاجة بالملليميتر ودي بتيجي في نقطة "الكمال" 
 

طيب المصاب بالوسواس القهري بيعمل إيه؟

- بيقوم بطقوس معينة عشان يرتاح من اللي بيحصل في دماغه زي إنه يقوم يتأكد من إن كل حاجة تمام سواء في بيته أو عربيته أو إنه مش ناسي حاجة وهو نازل

- بيتجنب أي حاجة تجيبله الأفكار اللي بيحاول يتخلص منها زي إنه ميدخلش المطبخ عشان فيه سكاكين

- بيتخزن حاجات قديمة وبلا هدف على أمل إنه ممكن يستخدمها في المستقبل 

وفي حاجات كتير جدا غير دول طبعا.

طيب إيه سبب الوسواس القهري؟ موقع الكلية الملكية للأطباء النفسيين بيجاوب على السؤال اللي حير ملايين:

- ساعات الموضوع بيكون جينات

- وأحيانا بيكون إجهاد من الحياة واللي بيحصل فيها

- حصل تغير جديد في حياتك أو شيلت مسؤولية زي إنك بقيت مسؤول عن البيت مثلا

- أحيانا وبشكل غير مؤكد بيكون بسبب إختلال كيميائي في المخ في مادة تسمى السيروتونين

- لو أنت شخص منظم جدا جدا ممكن ده يوديك لحتة الوسواس القهري لو بقيت منظم بشكل مبالغ فيه.

قبل ما ننتقل للجانب الإيجابي للوسواس القهري لازم طبعا نقفل بأهم حاجة عشان أكيد أنت أو غيرك ممكن تكونوا مصابين بالـOCD.. اعمل إيه واتخلص من ده إزاي؟

اللي بيخليها تكمل إنك بتحاول تبعد الأفكار دي بإنك تقوم بأفعال تقلل من قلقك ولذلك أنا هديلك التقيلة، أنت محتاج تعرض نفسك للأفكار دي وقاوم إنك تقوم بأي فعل يقلل من الموضوع ده، خلي دماغك تسرح عادي بس متقومش تعمل أي فعل لإن ده مسكن مؤقت وإحنا عايزين نخلص من الموضوع ده بشكل أبدي، وحاول تتواصل مع دكتور نفسي أو تبحث أكتر عن الإنترنت عن طرق علاج أو مجموعات دعم.

وبالرغم من المعاناة اللي بيمر بيها المصابين بالوسواس القهري، إلا إنه هناك جانب إيجابي يا جماعة هنقولهم في نقط، حسب موقع Elite Daily:

1- الإبداع: بعض الدراسات ربطت بين الوسواس القهري والإبداع لإن الدماغ بشكل عام نشطة طول الوقت، وكمان بتفكر في سيناريوهات مختلفة في الحياة، مثلا أنت لو دلوقتي هتقعد على كرسي واكتشفت إنه متوسخ، هتوجه كل طاقتك ودماغك إنك تلاقي حل للمشكلة مثلا يعني.

2- التفاصيل يا يحيي: المصابين بالوسواس القهري عندهم اهتمام قوي بالتفاصيل، زي إنه طول الوقت مهتم بمواعيده ومظهره وإنه لو عازم حد على العشاء، هيعملوا سفرة محترمة ومتروقة جدا.

3- التوجيه في الصح: أحيانا لو تم توجيه الوسواس القهري في اتجاه صح ده ممكن يفرق في حياتك العملية، أحد أعظم لاعبي كرة السلة في أمريكا "رأي ألين" اعترف إنه مصاب بالوسواس القهري وكمان ديفيد بيكهام أحد أشهر لاعبي كرة القدم في العالم، في النهاية اللي عايز أقوله إنك لو اتعلمت إزاي تخليه ميأثرش على حياتك بشكل سيء، ممكن يكون سبب في نجاحك في الحياة العملية.

4- أنت حاسس بالناس يا مان: المصاب بالوسواس القهري بيمر بأيام وشهور صعبة جدا لإن دي حاجة حصلتله غصب عنه ومش بإيده، فلما يشوف ناس مصابة بالإكتئاب أو القلق هيفهم الناس دي بتمر بإيه مش هيستهتر بمرضهم أو معاناتهم.

Comments: