ليه ماجد الكدواني هو التجسيد لمقولة "النجاح يذهب لمن يستحق"؟

10/12/2020

النهاردة 10 ديسمبر بنحتفل بعيد ميلاد الفنان ماجد الكدواني  الـ53، ماجد قضى فترة طفولته في الكويت ورجع مصر بعد حصوله على الثانوية العامة وقرر دراسة  الديكور المسرحي في كلية الفنون الجميلة واتخرج منها عام 1985

بداية علاقته بالتمثيل كانت من خلال شغله  في تجهيز ديكور المسرحيات في مسرح كليته، ومع حضوره للبروفات ده شجعه ينضم لفريق التمثيل في الكلية، و بعد تخرجه من كلية الفنون الجميلة قرر يدرس في المعهد العالي للفنون المسرحية سنة 1990

كانت بداية ماجد في التلفزيون في مسلسل "أرابيسك" لصلاح السعدني سنة 1994 وبرنامج "سر الأرض"، وفي نفس السنة كمان شارك في مسرحية "727" بطولة محمود عبد العزيز وهالة صدقي، وبدايته مع السينما كانت بعدها بسنتين في فيلم "عفاريت الأسفلت" بطولة "محمود حميدة" و"سلوى خطاب" بعدها شارك في أعمال كتير، لكن بداية شهرته في أوائل الألفينات مع مشاركته في فيلم "حرامية في كي جي تو" مع كريم عبد العزيز سنة ،2001 وبعدها شارك في مجموعة من الأفلام اللي معظمها كانت أفلام كوميدية زي "عسكر في المعسكر" و "الرجل الأبيض المتوسط" و "حرامية في تايلاند"، في المرحلة دي كان ماجد بيُصنف ممثل كوميدي  وعمل في الفترة جي فيلم من بطولته اسمه "جاي في السريع" سنة 2005 وماحققش الفيلم النجاح الجماهيري.. بعد فيلم "شيكامارا" واللي شارك فيه ماجد سنة 2007 مع مي عز الدين، نقدر نقول إنه بدأ يلعب أدوار مختلفة شوية عن اللون الكوميدي اللي الناس عرفته بيه، أدوار تقدر تظهر موهبته وقدراته التمثيلية بداية من فيلم "كباريه" سنة 2008 والفرح سنة 2009 وكان له تصريح وقتها قال فيه  "قررت الابتعاد عن المشاركة في أي أعمال درامية بناء على متعتي الشخصية لأني حابب السينما أكتر"

وبعد التصريح ده شارك ماجد في أعمال قدرت تظهر حجم موهبته وتعرف الناس عليه بشكل مختلف وإنه ممثل يقدر يعمل كل يلعب كل الأدوار ويكون مقنع فيها كلها، من الأفلام اللي شارك فيها ماجد كانت فيلم "678" واللي كان بيناقش قضية التحرش، ووقت عرض الفيلم في مهرجان شيكاغو الدولي لسنة 2011 أشادت لجنة التحكيم بأداء ماجد الكدواني ، ووصفته اللجنة "بالممثل صاحب الحضور القوي الذي يدفعك لمتابعته في كل مشهد يظهر به ".

وحصل ماجد عن دوره في نفس الفيلم جائزة أفضل ممثل في مهرجان دبي وبعدها استمر مشواره مع التكريمات والجوائز، في السنة اللي بعدها شارك ماجد في فيلم "أسماء" واللي كان بيتكلم عن معاناة مريضة إيدز وقامت ببطولته هند صبري، ماجد حصل عن دوره في الفيلم ده جائزة أفضل ممثل من مهرجان أبو ظبي السينمائي وأفضل ممثل من المركز الكاثوليكي، وفي 2013 حصل على جائزة جمعية الفيلم  كأفضل ممثل دور ثاني عن فيلم "ساعة ونص"

تألق ماجد استمر بعدها في أفلام كتير منهم "تراب الماس" و هيبتا" و"الشيخ جاكسون" واللي تم إنتاجه سنة 2017 ودي نفس السنة اللي حصل فيها على جائزة فاتن حمامة للتميز من مهرجان القاهرة السينمائي في دورته الـ39

ماجد اللي بيضحكك في أفلام زي "لا تراجع ولا استسلام"   و "طير إنت".. هو ماجد اللي ممكن تكرهه في "تراب الماس" أو تتفاعل مع قصته وتتعاطف معاه في "هيبتا".. هو ظابط الشرطة في "678".. وكلاوي الجينيس في "الرهينة".. والأهم إنه التجسيد الحقيقي لمقولة " النجاح لا يأتي بالصدفة، بل يذهب لمن يستحق".

كل سنة وإنت طيب يا ماجد! 

Comments: