كتب: محمود عادل
ظهرت مؤخرا على تويتر قصة لبنت اسمها "بسنت" تعرضت لحادثة تحرش جماعي في المنصورة، وحسب كلامها إن مجموعة كبيرة جدا من الشباب قفلوا الطريق عليها ومنهم اللي حاول يقطع لها هدومها ويتحرش بيها جسديا وجزء منهم كان بيصور.
بعدها بيوم أعلنت إنها عملت محضر وجالها رسائل دعم كبيرة على شجاعتها إنها خدت خطوة زي دي والناس عملوا هاشتاج #ادعم_بسنت.
وتم بالفعل القبض على عدد منهم.. ومن هنا بدء على الجانب الآخر، يوصلها رسائل تهديد وظهر هاشتاج مسيء لبسنت وبيدعم المتحرشين وكمان جروب على فيسبوك، نشروا فيه صور خاصة لبسنت بهدف التشهير بيها وقالولها إنهم هيقدموا بيها بلاغ!
وبعد كده قامت الإعلامية رضوى الشربيني، واللي دايما ليها مواقف داعمة مع قضايا كتير مشابهة، كتبت تويت بتدعم فيها بسنت، وبعتتلها رسالة.
وعلى تويتر فيه حساب اسمه "Speak up"، قالوا أن في محامي اسمه "هاني عبادة" وهو محامي المتهمين في القضية، طلع لايف على فيسبوك وكان بيعرض فيديوهات مختلفة لبسنت بس مكنتش واضحة وبيقولها "اللي عندي ده مش موجود عند حد غيري" وكمل كلامه بـ: "شباب لسا بالغ جديد شافوا واحدة متصورة كدة ولا كدة وعجبتهم، وإنتي بتعرفي تتصوري صور كويسة وتنزلي حاجات معينة.. لا وحلوة الصورة دي" في إشارة لصورة من صور بسنت.
واستكمل: "فا أنا بقولك يا أنسة ولا يا مدام ياسمين أنا معرفش أنتي متجوزة ولا بنت، ارجعي للنيابة واتعرفي على الولاد تاني وشوفي إذا كانوا هما ولا مش هما وإنتي دايما بتسافري على طريق"! وده كان جزء من كلام المحامي في لايف طلعه على حسابه على فيسبوك.
أستاذ هاني عبادة المحامي (اللي بيدافع عن المتهمين بالتحرش في قضية ميت غمر) طالع لايف على فيسبوك عشان يبتز البنت بصورها بشكل مباشر!!!
وماسك فيديو بيقول فيه "الفيديو ده مش مع حد"! و"ارجعي للنيابة عشان انتي واحده على طريق وبتسافري"!! تهديدات صريحة.
نقابة المحامين فين؟#ادعم_بسنت pic.twitter.com/vZ9uKaKwp7
وحسب موقع جريدة الوطن، إن الـ7 تم حبسهم 15 يوم على ذمة التحقيقات بتهمة التحرش الجماعي بفتاة في الشارع ووجهت لهم اتهامات زي التحرش وخدش الحياء والتنمر.
حسب موقع "مصراوي" ، "ياسمين" تقدمت ببلاغ لقسم ميت غمر، والمتهمين قالوا في التحقيقات النيابة، إن كان فيه 150 شاب ماشي وراها والموضوع تتطور للتحرش الجسدي وإنهم كانوا بيتفرجوا بس ومحدش تحرش بيها.
حساب "Assault Police" على إنستجرام واللي ميعرفوش الحساب ده، هو الحساب اللي كان له دور مهم في تحريك المياه الراكدة في قضايا تحرش كتير ظهرت السنة دي ودورهم كان فعال في مساندة ضحايا التحرش وإن المتهمين يتم القبض عليهم ومحاكمتهم.. الحساب كان بيدعم برضه قضية بسنت وعرض بعض التهديدات اللي بتتعرض لها وبيطالب بدعم بسنت خصوصا إن في فيديو متصور للواقعة وإن الشرطة قبضت بالفعل على المتهمين ولكن بعض من أهاليهم وأصدقائهم هددوا برش مياه نار على وشها -حسب كلام Assault Police- والـ"سكرينشوتس" اللي عرضوها.
