القصة الكاملة لخناقة حمو بيكا مع عمر كمال 

16/12/2020

نشر حمو بيكا مغنى المهرجانات في الحساب الرسمي بتاعه على انستجرام في خاصية الستوري و على الفيسبوك عنده كمان صورة لصاحبه عمر كمال وحط على صورته علامة غلط أو "X" باللون الأحمر وكتب عليها "ياريت محدش يكلمني في شغل على الشخصية دي عشان أنا كنت بحبها والشخصية دي بتتهرب من شغلي اللي خلاني اتفق عليه والاثبات بعد الصورة دي هنزل فيديو وهو عامل بيحبني وهو بيكرهني مع السلامة يا صحاب مزيفة". 

وبعدها فعلا نشر حمو بيكا فيديو قصير له هو وعمر كمال ومعاهم شخص كمان وهما بيقولوا للجمهور إن هيكون فيه أغنية جديدة هتنزل وهي أغنية "فستان الفرح".

وبعدها بشوية كمان ظهر حمو بيكا في فيديو لايف له على صفحته على الفيسبوك وهو بيتكلم فيه عن المساعدات اللي قدمها لعمر كمال في مجالهم مجال المهرجانات الشعبية زي أغنية "شمس المجرة" وأغنية "إنتي معلمة" وأغنية "فستان الفرح" وقال إن عمر كمال اتهرب منه بعد كمية المساعدات الكتيرة اللي قدمها له.

وبعدها بدقايق ظهر عمر كمال عشان يرد على حمو بيكا على صفحته على الفيسبوك في لايف كمان والفيديو كان عنوانه "الرد على بث حمو بيكا" واتكلم في الفيديو عن الحقوق والواجبات المهنية وإن هو كمان وقف جنب حمو بيكا وساعده في خناقات مع نقابة الموسيقيين، وقال إن الخلاف مش خلاف علةى فلوس أو خلاف مادي بس وإن طريقة الشغل اللي حمو بيكا بيشتغل بيها هي طريقة مش لايقة.

وقال كمان "أول أغنية أكسب منها مع بيكا كانت "إنتي معلمة" وكل الأغاني اللي قبل كده كنت بديها لحمو بيكا عشان ترفع من رصيد قناته ويكسب منها، بما فيهم أغاني كانت من إنتاجي أنا، والله مكنتش باخد فلوسهم لأني بكسب من زمان وسيبتك تاكل عيش".

كمل كلامه وقال" عيب تقول عليا إني صحبة مزيفة، أنا عمري ما كسبت من وراك، أنا سيبتلك ١٢ تراك كلت من وراهم الشهد، حتى العربية بتاعتك أنا اتصدرت عند المعرض عشان يقسطهالك، وضمنتك في مليون و٨٠٠ ألف جنيه، ولو كنت لوحدك مكنش حد هيديك عربية"، وقال في الآخر " "عيب يا حمو، افتكر العيش والملح وربنا يهديك".

ولكن الموضوع ماخلصش هنا بس، ظهر حمو بيكا في فيديو لايف تاني عشان يرد على لايف عمر كمال الأخير وقال إنه بيكدب واتهمه بالكدب، وهدده إن ممكن يقفل قناته على اليوتيوب، ونصحه إن الفلوس أو الأجر بيكون مقابل الشغل وإنه مش هيدفع له حاجة إلا بعد ما العمل المشترك اللي بينهم يتم ويخلص.

والجدير بالذكر إن حمو بيكا من يومين كان ظهر في فيديو له على "انستجرام" وهو بيهاجم واحد من مطربين المهرجانات من غير ما يقول اسمه، لكن قال إن المطرب ده أغانيه كانت أكتر أغاني تم البحث عنها على جوجل في  و2020، وقال بيكا إن المطرب ده أناني.

Comments: