في مصر.. كيف يتعامل الناس مع المصابين بكورونا؟  وماذا لو نقلت العدوى لشخص تحبه دون قصد؟!

17/12/2020

كتب: محمد إنسان

عزيزي القارىء أهلًا بيك..
من بداية انتشار فيروس كورونا والناس في العالم كله بتتجنب الاقتراب أو التعامل مع أي شخص يظهر عليه مجرد أعراض لدور برد مثلًا أو بيكح بسبب مشاكل تنفسية وما شبه.. فمابالك بقى لو عرفت إن الشخص ده عنده كورونا؟!

أكيد مليون في الميه أي شخص عاقل ناضج هيبعد فورًا عنه وهيتجنب التعامل معاه نهائي.. ولكن!
الطريقة بتفرق! يعني مش لازم خالص نوصل للشخص المُصاب إنه وباء ماشي على الأرض ونبصله بنظرات احتقاره وكأن هو السبب في وجود الفيروس أو مبسوط بيه! ممكن حضرتك تتجنبه وماتتعاملش معاه بذوق وشياكة وأدب مراعاة لحالته النفسية اللي هتفرق كتيير جدًا جدًا في علاجه!

طيب ده الشخص المصاب اللي ماعملناش أي حاجة غير إنه اتصاب بالعدوى غصب عنه.. نيجي بقى للشخص المصاب اللي اتعاملنا معاه ونقلنا العدوى دون قصد منه أو تخطيط مسبق! لإن أكيد مفيش حد في الدنيا هيبقى قاصد يعدي أصدقائه وأهله وزمايله والناس للي بيحبهم!

إزاي في مصر بالذات الناس بتتعامل مع الشخص ده؟

للأسف الشديد ومن أمثلة كتير جدًا شوفتها قدامي.. إن لو شخص نقل العدوى لحد بدون قصد بيتعامل معاملة المجرمين! وكأنه السبب في وجود الفيروس أو قاصد ومتعمد إصابة غيره! والناس نسيت إن فيه قدر وإن فيه نصيب وإن ربنا كاتب كل شيء بميعاد!

ده طبعًا بيأثر نفسيًا جدًا على الشخص المناسب بالإضافة لإحساسه بالذنب تجاه أهله وأصدقائه في إنه السبب في مرضهم وقلقهم وخوفهم والموضوع بيتعبه نفسيًا جدا وبيأثر على تعافيه من الفيروس بشكل كبير..

اللي عايز أقوله في النهاية إننا في فترة صعبة.. لا أحد يعلم إمتى هتعدي وإمتى هنفوق من الكابوس ده.. فالمفروض نخفف على بعض ونعدي المحنة سوا! ندعم المصابين ومانحسسهم بإنهم وباء ولا نحسسهم بإنهم مجرمين! نحس ببعض يا جماعة لإن كل واحد بيبقى شايل هم كبير جداً بجانب مرضه.. ربنا يكتب السلامة للجميع ويعدينا منها بسلام وأمان.

Comments: