مع بداية الموجة التانية.. بنفكرك بـ 11 ميزة لقعدة البيت بعد ما بقيت خبرة فيها 

21/12/2020

بما إن الموجة التانية من كورونا بدأت وبدأ معاها الإغلاق ووقف حركة الطيران بسبب السلالة الجديدة منها ومحليًا في مصر نسبة الإصابات زادت تاني وناس كتير قرروا هيبدأوا يشتغلوا من البيت وفيه أطفال مش هتروح المدرسة وأغلب العلامات بتقول إننا هنرجع تاني لوقت الحجر الصحي وقعدة البيت وإن ده مش "ديجافو".

بس المفروض إنك بقيت خبرة دلوقتي وقعدت تقريبا 5 شهور في البيت قبل كده وطلعت بدروس مستفادة إن الإنسان بيعرف يتأقلم مع أي وضع بيتحط فيه وبيحاول ينجو، فخلينا نفكرك بالحاجات اللي كنت بتعملها (في حالة إنك نسيتها) ونسيت تتأقلم إزاي:

1- في الأول خالص كنت حاسس إنك مش عارف تشوف حد ولا تشوف صحابك فنزلت كام "أبلكيشن" على موبايلك عشان تكلم صحابك عليهم فيديو كوول، و"فيسبوك" كمان عمل "أبديت" جديد وهو الـ"Rooms" ممكن تكلم فيها صحابك وتغنوا فاكر أيام لمتنا وكل الحاجات اللي كنت بتعملها دي 

2- نفس الكام "أبلكيشن" كنت بتستخدمهم برضه في الشغل والمكالمات المهمة وخناقات الشغل

3- كنت بتصحي متأخر عن ميعادك بتاع الشغل ساعة أو ساعتين كما عشان ماكنش فيه فقرات زي بتاعت لازم تصحي تلبس وتتشيك وتنزل ووقت المواصلات وده كان عاجبك (عشان لو كنت ناسي بس بنفكرك) ده غير كمان إنك كنت بتصحي تفتح اللاب توب جنبك وتقول إنك بتشتغل وتناملك شوية عقبال ما حد يفتكرك.

4- بعد ساعات العمل الرسمية كنت بتتغدى أكل بيتي وسخن وحلو وبسمسم وكانت مظاهر الاسرة المصرية والدفئ موجودة في اللقطات دي بس 

5- كنت بتتجاهل أي فرصة للخناق عشان تفضل محافظ على الدفئ الاسري عشان ماكنش هيبقى وباء عالمي وخناقات أسرية وحبسة بيت، فكنت بتعرف تحل المشاكل بكل هدوء 

6- كنت بتعمل كيكة.. فاكر وصفات الكيكة وعجينة العشر دقايق اللي عملوا منك طباخ ماهر في 3 شهور وكنت مزهق الفلورز بتوعك على السوشيال ميديا بصورهم؟

7- كنت بتأكل كتير وطلعلك كرش وتخنت شوية وجناب بس دي مش هنفكرك بيها فاعتبر نفسك ماقرتهاش 

8- كنت بتلعب رياضة في البيت أو كنت بتنزل تجري أو تتمشى ودي حاجة كويسة بقى هنفكرك بيها 

9- كنت بتكراش على أي حد من الفراغ اللي كنت فيه وغالبا كلمت الإكس وماعرفتوش ترجعوا لبعض عشان هي العلاقة أصلا "توكسيك" مش الوباء اللي هيصلحها يعني 

10- كنت بتتابع مسلسلات واتفرجت على أفلام ماشوفتهاش وبدأت تبقى الناقد طارق الشناوي

11- كنت موفر كمية فلوس حلوة، أه صرفتها كلها على "الأونلاين شوبينج" أو بعد ما نزلت بس عرفت توفر وتحوش وتحس إنك ملك زمانك.

Comments: