في ميلاد دينزل واشنطن.. أفلام هتقولك ليه هو من أفضل الممثلين؟

27/12/2020

كتب: محمود عادل

دينزل واشنطن بعتبره من الممثلين المظلومين وممكن يكون الأغلبية حصرينه في حتة إنه ممثل أكشن وإن أدوره مكررة.. وإن أفلامه غالبا مش بتاخد اهتمام كبير من الناس، ولكن اللي شاف أفلامه هيعرف قد إيه دينزل واشنطن كان له مشاهد كتير أبدع فيها وقد يندمج في الشخصية بالشكل المناسب بدون افتعال، ونقدر نقول إنه "الفنان الذي يعمل في صمت" وكمان واشنطن اترشح لـ170 جائزة وفاز منهم بـ84 بس اللي بشوفهم أهم في مشواره الفني، جائزتين أوسكار عن أفلام Training day و Glory وبالإضافة لجائزتين جولدن جلوب عن أفلام Glory و The Hurricane.

في الجزء ده هرشحلكم أفضل أفلام شوفتها لدينزل واشنطن:

1- فيلم Training Day

دينزل واشنطن بيعمل كضابط شرطة فاسد وكان مطلوب منه يدرب شرطي جديد، الفيلم أحداثه بتدور في يوم وأغلبها في الشارع، وكان في حوارات ممتعة بين إيثان هوك ودينزل واشنطن.. بس ممكن نقول إن كل أحداثه كوم، ومشهد النهاية كوم تاني تماما

2- فيلم Flight

الفيلم أحداثه بتدور عن طيار أنقذ ركاب على طائرته والناس وقتها اعتبروه بطل وإنه قام بشيء صعب جدا، بس في النهاية التحقيق كشف حاجات جديدة، ولكن زي الفيلم اللي فات، مشهد المحاكمة حصل فيه تحول كبير في أداء دينزل واشنطن وكان من أفضل مشاهده في الفيلم.

3- فيلم Man on Fire

أحداث الفيلم بتحكي عن ضابط سابق في المخابرات الأمريكية بيكون مكلف بحماية بنت رجل أعمال، الفيلم أحداثه ماشية عن إزاي بيحاول يحميها من أي مخاطر وفي نفس الوقت العلاقة الإنسانية اللي بتنشئ بينهم بمرور الأحداث، وعادة أفلام دينزل واشنطن لازم يكون فيها مشهد نهاية مؤثر وميتنسيش.

4-فيلم The Taking of Pelham 123

فيلم أحداثه بتدور خلال يوم واحد، وبتتكلم عن عامل في مترو أنفاق نيويورك اللي فجأة بيلاقي قطار اتخطف من أشخاص مسلحين، وزعيمهم بيرفض التفاوض مع أي حد غير والتر جاربر أو دينزل واشنطن، الفيلم رتم أحداثه سريعة ومش مملة.

5-فيلم The Equalizer

الفيلم ده على المستوى الشخصي أنا بحبه، ممكن تكون قصته مش جديدة ولكن أداء دينزل واشنطن الهادي السهل جدا والغير مفتعل يشدك إنك تشوف الفيلم، واللي بالمناسبة هما جزئين، بيتكلم عن ضابط كوماندوز متقاعد بيقبل بنت وبيحاول ينقذها من عصابات مسيطرة عليها وبتستغلها في أعمال مشبوهة ده غير إنه بيحاول تحقيق العدالة طول الوقت.

6-فيلم Fences

الفيلم بيتكلم عن الأب اللي بشتغل في شركة لجمع القمامة في مطلع الخمسينيات وهو بيكافح عشان يقدر يوفر حياة جيدة لأسرته، واحد من المشاهد القوية في الفيلم اللي جمعته بإبنه وقت ما سألوا تفتكر أنا بوفرلك كل حاجة ليه؟ قالوا عشان بتحبني.. بس تروي كان له إجابة أشبه بالمفاجأة.

7-فيلم John Q

جون كيو بيعيش حياة سيئة جدا بعد ما إبنه تعب ومحتاج عملية زرع قلب لكنه مش قادر يتحمل تكاليفها، فبيلجأ لحل البعض ممكن يشوفوا غريب بس بيمثل المدى اللي ممكن توصله تضحية الأب علشان أبناءه


 

Comments: