العثور على مئات من الطيور ماتت في شوارع روما بسبب الألعاب النارية في ليلة رأس السنة

03/01/2021

يوم الجمعة 1 يناير 2021 في شوارع روما في إيطاليا تم العثور مئات من الطيور الميتة في الشوارع وقالوا بعد كده إن ده كان بسبب الألعاب النارية في احتفالية رأس السنة لإن الطيور اتصابت بنوبات قلبية فماتت من الألعاب النارية.

وكان من ضمن الأماكن اللي وقع فيها عدد كبير من الطيور المصابة هي طريق "فيا كافور" ومحطة قطار " تيرميني" في روما وده اللي اتسبب في صدمة لعدد كبير من المارة في الشوارع، وقالت جماعات حقوق الحيوان إن المأساة دي نتجت عن الألعاب النارية بتاعت ليلة رأس السنة اللي رعبت الطيور.

والسائق اللي خد الصورة قال إنه شئ محرج وحزين ومايتصدقش"، ولكن لحد دلوقتي لسه مفيش أي أخبار مؤكدة عن سبب موت الطيور.

ومنظمة حفظ حقوق الحيوان الإيطالية "OIPA" دعت لمنع الألعاب النارية وحظر بيعها لإنها بتشكل تهديد على صحة الحيوانات، وقالت المتحدثة باسم  "OIPA" "لوريدانا ديجليو" إن الطيور ممكن تبقى ماتت بسبب الخضة فممكن يبقوا خبطوا في الشبابيك أو في سلوك الكهربا أو جالهم نوبات قلبية.

وقال ماسيمو كومباروتو  رئيس"OPIA" إنهم بيكرروا كل سنة نفس النداء لحظر بيع الألعاب النارية ولكن القواعد عديمة الفايدة ومفيش سيطرة، وفي كل سنة بيحسبوا عدد كبير من الحيوانات اللي ماتت أو اتصابوا بسبب الألعاب النارية.

وقال عدد من الناس على الفيسبوك والسوشيال ميديا إن الظاهرة دي خلتهم يتشاءموا من 2021 والبعض الآخر لام على المدينة إنهم مامنعوش الألعاب النارية.

وانتشرت على السوشيال ميديا بوستس بتكدب الأخبار اللي حصلت دي وبتشير إنها قديمة ومن شهر فبراير 2020 بسبب عواصف رياح شديدة اتسببت في وقوع شجرة، وقالوا برضه إن الصورة دي انتشرت في أبريل 2020 على إشاعات وأخبار كاذبة إن الطيور دي ماتت بسبب كورونا، ولكن الأحداث دي السنة اللي فاتت كانت حاجة وموت الطيور ليلة رأس السنة بسبب الألعاب النارية أو على الأرجح يكون السبب هو الألعاب النارية دي أحداث تانية.

Comments: