ملخص قصة ارتفاع سعر البيتكوين.. وتوقعات لارتفاع قيمتها في 2021 

04/01/2021

لو عمرك ما سمعت عن البيتكوين أكيد الفترة اللي فاتت هتبقى سمعت عنها خصوصا إنها تريند على السوشيال ميديا من فترة بعد التطورات اللي حصلت فيها، بس إيه هي البيتكوين في الأول؟ 

البيتكوين هي عملة رقمية زيها زي الدولار واليورو، ولكن هي مالهاش أي تواجد مادي على الحقيقة هي موجودة على الإنترنت بس، ومالهاش هيئة تنظيمية مركزية بتقف وراها، وظهرت في العالم سنة 2009 واللي اخترعها شخص غامض محدش عارفة بس اطلق على نفسه اسم "ساتوشي ناكاموتو"، وعمل العملة مخصوص عشان يتم استخدامها في عمليات الدفع اللي مافيهاش رقابة من الحكومة ولا فيها رسوم معاملات ومافيهاش تأخير في التحويلات عكس العملات الورقية.

سعر عملة البيتكوين في سنة 2010 كان 0.0003 سنت للعملة الواحدة بس مرة واحدة في أكتوبر 2017 بقى سعرها 4200 دولار أمريكي، وفي  الوقت ده بقى ظهرت مئات من العملات الافتراضية التانية ولكن لكل عملة منهم مميزاتها.

بس في آخر 2020 انتشرت صور كتير لسعر البيتكوين اللي بقى يكون ثروة، وآخر سعر للبيتكوين النهاردة 4 يناير 2021 هو "476,835.75" جنيه مصري للـ 1 بيتكوين، وعشان القفزة اللي حصلت فيه قال رئيس الجمعية الروسية للاقتصاد المشفر والذكاء الاصطناعي وبلوكتشين "يوري بريباتشكين" إنه بيتوقع إن مؤشرات عملة البيتكوين هتوصل في 2021 إلى مستويات أعلى من كده كمان، وحسب التوقعات الإيجابية هتتجوز تكلفة البيتكوين 65- 75 ألف دولار في الربع التالت من 2021، ولو هيبقى فيه توقع لسيناريو سلبي يبقى سعرها هيتراوح بين 10 لـ 25 ألف دولار، ولو ده حصل هتتجاوز السعر ده لفترة قصيرة وهتنمو تاني في سنتين 2022 و 2023 

وقال مؤسس مشروع "Tokenbox" "فلاديمير سميركيس" وفقاً لكلام موقع سبوتنيك الروسى إن "استحداث العملات المحدود بيساهم في ارتفاع سعر البيتكوين بسرعة، و إن تم إنشاء أكتر من 19 مليون عملة بيتكوين، وبيعتقد إن  في 2021 ممكن نشوف بسهولة قيمة عملة البيتكوين بتوصل لـ 50 ألف دولار، لكن العملة هتعاني من الصعود والهبوط المتكرر، عشان كده لازم المستثمرين يصبروا"

لكن مدير مركز تقنيات مصفوفة المحاسبة الاجتماعية "فلاديمير بانوشكين" توقع  إن سعر العملة يهبط لـ 12 ألف دولار في مارس وأبريل وبعدين هيرتفع لـ 60 ألف دولار.

لكن رئيس صندوق استثمار العملات المشفرة "ياكوف بارينسكي" شايف إن احتمال كبير  سعر البيتكوين يرتفع ويوصل لـ 100 ألف دولار في 2021، ورئيس قسم تحليل البيانات في شركة "بروكر" "يوري مازور"  شايف زيه برضه وبيقول إن  السيناريو الإيجابي هو ارتفاع السعر لـ 90 ألف دولار في نهاية 2021، والمتوسط 50 ألف دولار، وأما السيناريو السلبي هو انخفاض السعر لـ 10196 دولار.

 موقع "كوين ماركت كاب" قال إن البيتكوين سجلت ارتفاع بنسبة 2.6% في خلال ساعات لكن في الأسبوع الأخير بس ارتفعت بنسبة 23.11% وسجلت أعلى تعاملات ليها في صباح يوم الاثنين 4 يناير 2021.
 

Comments: