ملخص تدهور الحالة النفسية لحورية فرغلي.. "ماحدش بيسأل عني"

05/01/2021

خلال اليومين اللي فاتوا اتصدر اسم الفنانة حورية فرغلي تريند السوشيال ميديا وده كان بعد تصريحاتها في مكالمة هاتفية مع تلفزيون "اليوم السابع" اللي قالت خلالها كذا تصريح عن تدهور حالتها النفسية خلى الناس على السوشيال ميديا تتعاطف معاها جدا.

قال الفنانة حورية فرغلي "ماحدش بيسأل عني، والكل بعد عني، وحتى الناس اللي كنت برعاهم، وبيشتغلوا معايا سابوني"، وقالت كمان "تليفونى بقاله 3 سنين مابيرنش، ماحدش بيدعيني في الحفلات، أو المسرحيات، ولا أي حاجة"

وكملت وقالت "لو الوسط الفني مش عايزني، يقولولي وأنا هختفى خالص"، وصرحن إنها بتعاني من فقدان حاسة الشم والتذوق من حوالي 4 سنين بسبب عمليات جراحية الأنف اللي عملتها، إن الجمهور بيشتمها وبيوجه لها كلام مش لايق وبيستهزءا من شكلها  ومن شكل وأنفها.

وقالت كمان إنها هتعمل عملية جراحية مع طبيب عالمي عشان ترجع لشكلها السابق، وأشارت أن فيروس كورونا منعها من السفر لأمريكا لإجراء العملية"، وأضافت إن "لبلبة ورانيا محمود ياسين، هما الوحيدتان اللي كانوا بيتطمنوا عنها"، وصرحت وقالت "كنت بقول عايزة أروح قبري، بسبب شتيمة الناس".

وبعدها انتشر كلام حورية فرغلي على السوشيال ميديا وظهرت في مداخلة هاتفية تاني في برنامج "مساء دي إم سي" المذاع على قناة "DMC" وقالت "كل الناس بعدت عني والناس اللي كانت تشتغل معايا من 10 سنين مش بتفكر ترفع سماعة التليفون تسأل عليا، هي الناس نسيت لما كنت فوق القمة والناس كلها حواليا".

وانهارت حورية فرغلى خلال المداخلة الهاتفية وهي بتصرح عن حالتها النفسية ومواجهتها للاكتئاب بنفسها من غير أي دعم وقالت "أنا حابسة نفسي بقالي 10 شهور في غرفة نومي وأنا كنت فاكرة إن أصحابي بيحبوني لكن لأ، لما ناس كتير من الوسط عرفت إني مش هشتغل في الفن لحد ما اعمل عملية في الأنف كله اختفى، أنا عملت 38 عمل في 7 سنين وأنا كنت بشتغل وأنا تعبانة".

وقالت إن أخوها هو الشخص الوحيد اللي كلمها في رأس السنة واتمنى لها سنة سعيدة ومحدش افتكرها، وده كسر قلبها، وإن لو حصلت حريقة في بيتها مش هتشم ريحة الشياط لإنها بسبب حادثة مناخيرها فقدت حاسة التذوق والشم"

الجدير بالذكر إن ساحرة الجنوب أو حورية فرغلي كانت ملكة جمال مصر في 2002 وإن الحادثة اللي حصلت معاها إنها وقعت من فوق الحصان وبتمارس رياضة ركوب الخيل اللي كانت بطلة فيها، ولكن هيكل مناخيرها اتكسر، واضطرت تعمل في مناخيرها عمليات تجميل كتير عشان تقدر ترجع للتمثيل والفن تاني ولما رجعت وعملت مسلسل ساحرة الجنوب اتعرضت لحملة تنمر واسع بسبب مناخيرها من السوشيال ميديا وناس كتير انتقدت ظهورها.

نتمنى إن مداخلاتها التلفزيونية دي تنبه ناس كتير من اللي كانوا جنبها وحواليا ويقدروا يساعدوها ويدعموها نفسياً لحد ما تعدي من فترة الاكتئاب دي.

Comments: