القصة الكاملة لهجوم حلمي بكر على هاني شاكر 

06/01/2021

ظهر الفنان هاني شاكر نقيب الموسيقيين في لقاء تلفزيوني على قناة "MBC" مع الإعلامية ياسمين عز في برنامجها "سهرة الخميس" وقال خلال اللقاء إن مشكلته في أغاني المهرجانات في كلمات الأغاني ومش في الموسيقى ولا في أصوات أصحابها أو اللي بيغنوها.

وإن المهرجانات الشعبية حققت نسبة انتشار واسعة، والأزمة الوحيدة بتكمن في اختيار الكلمات المقدمة، وبتصل لقطاع كبير من الشباب والأطفال، وبعض الناس بتقلدهم في ترديد الكلمات دي وصرح إن "الموسيقى حلوة ومفيش مانع إن الشباب ترقص عليها عادي، خلي كله يرقص وينبسط".

وتصريحاته دي أثارت جدل كبير وهاجمه الموسيقار حلمي بكر وقال لبعض المواقع الصحفية "رايحين في ستين داهية، إيه المبرر اللي يخليك تقول كده، حالنا الغنائي وصل لمستوى صعب، والأغاني بقى شكلها صعب جدا".

وأضاف كمان "هاني شاكر يتحمل المسؤولية الكاملة للى بيحصل على الساحة الغنائية حاليا، ولما نضيع نبقى نسأله بقى وقتها، وأبسط واجبات نقابة المهن الموسيقية هو حماية الأغنية بشكل خاص والفن بشكل عام".

وتابع كلامه وقال "الجهلاء بس هم اللي متصدرين مشهد الغناء في الوقت الحالي، واللي بيعملوا هاني شاكر من تحايل على الموقف مرفوض تماماً، لازم يكون فيه موقف صارم ضد اللي بيحصل ده"

وصرح لمواقع تانية إن الأيام الجاية هستشهد إنحدار وقال إن الفنان الكبير مايصحش إن يتجه للنوعية اللي زي دي من الأغاني أو حتى يغني بغير لهجته زي اللي عمله هاني شاكر وغنى خليجي.

ووضح حلمي بكر إن اللوم هنا على المصنفات الفنية ووزارة الإعلام والسياحة في إيقاف النوعية دي والحل مش في المنع لكن في إنتاج الأغاني الجيدة كتير عشان تطغى على النوعية دي من الأغاني.

الجدير بالذكر إن من فترة استنكر الموسيقار حلمي بكر قبول الفنان هاني شاكر نقيب المهن الموسيقية اعتذار مؤدي المهرجانات حمو بيكا واتنازل عن القضايا المقدمة ضده وقال بسخرية "مبروك.. بكرة هيخلفوا أغاني صغيرة".

وصرح وقال إنه مايستبعدش اقتحام حمو بيكا مقر نقابة الموسيقيين تاني في حالة أي أزمة تحصل بينه وبين أعضاء مجلس النقابة  وإن الحالة الغنائية في مصر بقيت دون المستوى، ومش هتقوم لها قومة مرة تانية".

وإن الأمر مابقاش غناء دلوقتي، هو بقت ضحك وباتون ساليه، مين يقول إيفيه ويضحك الناس أكتر.. والضحك على الدقون هيبقى للركب"، وأكد إن تصالح هاني شاكر مع حمو بيكا هتظهر تداعياتها في المستقبل القريب، بشكل يضر حال الغناء.

Comments: