أفلام منتظرة في 2021

06/01/2021

كتب: محمود عادل

أفلام كتير كان العالم مستنيها في 2020 ولكن تأتي الكورونا بما لا تشتهي السينمات ومحبيها، بس عملا بمقولة إتقل تأخد حاجة نضيفة، فا سنة 2021 هيكون فيها فيضان أفلام جديدة ومش عادية، وأفلام تقيلة تقيلة يعني ونسأل الله التساهيل إن مواعيد إصدارها متتغيرش زي فيلم No time to die اللي معاده اتغير أكتر من مرة وكان في كلام عن إن هيتم عرضه على المنصات الرقمية وده لسا مش مؤكد ولكن خلونا نخش على الأفلام ومواعيدها.

فيلم No Time To Die - (2 أبريل)
الجزء الخامس والعشرين من سلسلة جيمس بوند واللي بيقوم ببطولته دانيال كريج واللي غالبا هيكون أخر جزء له في السلسلة، وكمان وجود رامي مالك في الفيلم اللي بيمثل دور الشرير مُحمس جدا لمشاهدة الفيلم.

فيلم Fast and Furious 9 - (28 مايو)
أحداث الجزء التاسع بتدور عن محاربة تيم فين ديزل لأحد القتلة المحترفين، وأكتر ظهورين مميزين في الفيلم هيكونوا لجون سينا وشخصية هان اللي اتوفى في الجزء السادس ولكن هيرجع فلاش باك غالبا.


فيلم Venom: Let There Be Carnage (25 يونيو)
توم هاردي في الجزء ده بيواجه قاتل متسلسل اسمه كارنج واللي بيلعب دوره "وودي هارلسون"

فيلم The Suicide Squad  - (6 أغسطس)
الفيلم غالبا مش هيكون استكمال للجزء الأول اللي صدر في 2016، ولكن هيتكلم عن ظهور هارلي كوين وعصابتها، والفيلم فيه أبطال كتير كبار زي سيلفستر ستالون وإدريس ألبا ومارجوت روبي 

فيلم Mission: Impossible 7 - (4 نوفمبر)
مفيش تفاصيل عن قصة الجزء الجديد، ولكن الفيلم أخد ضجة واسعة بعد ما انتشر تسريب صوتي لتوم كروز وهو بيتخانق مع العاملين في الفيلم عن إنهم مش لابسين كمامات وهددهم بالطرد وده كان كفيل بعمل دعاية مجانية للفيلم.

فيلم Spider-Man 3 - (17 ديسمبر)
للأسف الجزء الجديد مفيش أي تفاصيل عن قصته ولكن نأمل الفترة الجاية نعرف أكتر عنه

فيلم  The Matrix 4 - (22 ديسمبر)
للأسف مفيش تفاصيل بردو عن الجزء الجديد ولكن أكيد كيانو وفيلم ماتريكس ليهم قاعدة جماهيرية كبيرة.

 

Comments: