دراسة: أصحاب الأوض الفوضوية أكتر إبداع من أصحاب الأوض النضيفة 

13/01/2021

طول ما انت بتـ"سكرول داون" على الفيسبوك هتلاقي نفسك بتشوف إعلانات عن الترويق والنضافة و"بوستس" بتتكلم عن قد إيه النضافة والترويق حاجة صحية ولو فتحت التلفزيون هتلاقي إعلانات عن منتجات نضافة برضه، ولكن فيه دراسة اتعملت نشرها موقع "apa" وقال فيها إن لو كنت بدور على الإبداع فإنت محتاج تستمتع بالفوضي.

موقع "apa" نشر دراسة كانت في عدد سبتمبر من مجلة "Psychological Science" وقالت مؤلفة الدراسة "كاثلين فوهس" دكتورة في كلية الإدارة في جامعة مينيسوتا كارلسون إن الشغل في أوضة مترتبة بيشجع الناس إنهم يعملوا حاجات صح أو حاجات مسؤولة إجتماعياً ومعايرها مثالية زي إنهم ياكلوا أكل صحي أو يتبرعوا لجميعات خيرية لكن الشغل في أوض فوضوية بيساعد الناس إنهم يجربوا حاجات جديدة ويوصلوا لأفكار مختلفة وإبداعية.

وعمل دكتور "كاثلين" 3 تجارب في البداية على 34 مشارك كان نصهم كاتب في بياناته إنه بيحب أوضته تبقى متروقة والنص التاني قال إنه بيحب يشتغل على مكاتب مش فوضوية وعليها ورق كتير منعكش، وبعد كده طلبت منهم إنهم يتطوعوا في مؤسسة خيرية وعرضوا عليهم اختيارات يتبرعوا بيها زي إنهم يتبرعوا بفاكهة مثلا زي التفاح أو يتبرعوا بحلويات أو فلوس، ولقى الباحثين في التجربة دي إن 82% من المشاركين اللي كانوا بيحبوا الأوض النضيفة المتروقة اتبرعوا بفلوس، و47% من أصحاب الأوض الفوضوية، واختار 67% من أصحاب الأوض المتروقة إنهم يتبرعوا بالتفاح، واختار 20% من أصحاب الأوض المبهدلة الاختيارات الصحية، وهنا اعتبرت إن فريق النضافة فازوا بنقطة.

لكن في الجزء التاني من التجربة طلب الباحثين من 48 مشارك إنهم يبتكروا استخدامات جديدة لكرة البينج بونج، ومرة تانية كان نص المشاركين من أصحاب الأوض الفوضوية والنص التاني من أصحاب الأوض النضيفة، فكر الفريقين في نفس العدد من الأفكار، لكن كان فيه لجنة مستقلة بتقيم أفكار المشاركين وفي النقطة دي كسب أصحاب الأوض الفوضوية في الأفكار الأكتر إبداع لإنها كانت واضحة بشكل كبير.

وفي الجزء التالت والأخير طلبت دكتور "كاثلين" من 188 مشارك إنهم يقولوا تفضيلاتهم في "منيو" في مطعم قريب وبرضه كانوا نص ونص، ويقيموا الأكل اللي في الـ"منيو"، ولقى الباحثين إن التصنيفات بين "كويس" أو "تقليدي" ولقوا إن أصحاب الأوض النضيفة كانوا بيميلوا أكتر للأكل الصحي اللي اسمه تقليدي، والأشخاص اللي في الأوض المتبهدلة ببيميلوا أكتر إنهم يجربوا أكل جديد.

البحث وقتها اتكلم عنه كذا شخص في التلفزيون، وقالت مؤلفة الدراسة إن السبب بيرجع لإن الناس بتحس إن عندهم مبرر لأفعالهم، وقال كمان إن فيه صناعة بمليارات الدولارات عشان تساعد الناس يتخلصوا من الفوضى في حياتهم وبيوتهم والكل عايز يبقى حلو وأنيق، لكن ساعات الفوضى بتبقى حاجة حلوة.

Comments: