السبب الحقيقي ورا إن تيتا وماما كل ما يشوفوك يأكلوك 

14/01/2021

أكيد جربت في وقت من الأوقات تبقى قاعد مع مامتك أو جدتك وكل اللي بيعملوه في القعدة إنهم بيجبولك أكل عشان تاكل أو بيحاولوا يأكلوك حتى لو شبعان، ويمكن ده مابيكونش مع مامتك وجدتك بس وهتلاقي إن الناس اللي بتحبك بتبقى عايزة تأكلك أو بتبوظلك الدايت كنوع من إظهار الحب، ده غير إن فيه مقولة بتقول إن أقرب طريق لقلب الراجل معدته، وده بيثت إن الشخص لما حد بيأكله بيحبه هو كمان، فيعني المعادلة كده ماشية صح.

أكيد قبل كده حسيت إنك جعان لأسباب مش متعلقة بالأكل، يعني لو كان عندك يوم صعب في الشغل ممكن تروح تاكل بعد الشغل أيس كريم عشان تحس إن حالتك أحسن، أو لو بتمر ببعض المشاكل العاطفية هتلاقي إن التلاجة هي مخرجك الوحيد من الأزمة دي، وده لإن الأكل وأنواع معينة منه مرتبطة بفرز هرمونات السعادة والرضا وبيتم إفرازهم بشكل طبيعي بعد ما تاكل، وده برضه السبب الأساسي اللي بيخلي بعض الأشخاص اللي بيتصابوا بالاكتئاب بيعانوا من زيادة الوزن كأثر جانبي لمشاعرهم وطريقة منهم للنجاة من المشاعر ومن حالته النفسية.

لو قعدت مع مامتك وبقالك كتير ماشوفتهاش أو جدتك أو خالتك هتلاقي إنهم مابيقبلوش إجابة لا أو ماليش نفس أو شبعت اللي ممكن تتقال على الأكل، ولإن أكيد فيه إجابة لسؤال ليه الشخص بيحب يأكل الناس اللي بيحبهم لقينا موقع "justtherightbyte" قايل تفسير منطقى على السؤال ده في واحد من مقالاته.

موقع "justtherightbyte" بيقول أكيد الناس اللي بتأكلك مش خايفين عليك تموت من الجوع لإن محدش بيموت من الجوع وخصوصا لما تبقى لسه واكل صنية مكرونة بشاميل بالعافية، ولكن الحاجة المختلفة اللي بيبقى عايزها الشخص اللي بيأكلك هو إنه عايزك تحس بالرضا أو السعادة عن طريق الأكل، وغالبا بتبقى دي طريقة الأشخاص نفسهم اللي بيقدموا الأكل في التعافي من أي مشاكل بيعانوا منها وبيبقى الأكل مصدر الراحة بتاعتهم ورفع حالتهم المزاجية.

عشان كده لو حد قرر إنه يعزمك على العشا أو إنه يخرجك تاكل أيس كريم أو لو سألك جعان ولا لا اتأكد إن طريقة منه لإظهار الحب والمودة والرعاية.

خصوصا كمان إن فيه نوع من الأكل اسمه الـ"Comfort food" وهو نوع الأكل اللي  بيحسسك بالدفى والأمان الداخلي وفي معظم الأوقات بيكون الأكل الغني بالكربوهيدرات أو الدهون والأكل اللي فيه سكريات، بس لو عايز تحافظ على صحتك أو جسمك اتأكد إنك مابتاكلش الـ"Comfort food" لإنه بالرغم من السعادة والراحة اللي بيسببهالك فهو بيتسبب في زيادة وزنك أو بيأثر بشكل غلط على صحتك.

فممكن المرات اللي هتاكل فيها مع ناس بيحبوك تخلي ده نوع الأكل معاهم بس لو مفيش عزومة أو مش رايح لست الحبايب أو تيتا أو هتقابل شريكك حاول تاكل أكل صحي وسيب للمناسبات دي الـ"Comfort food" لإنه مش مسموحلك تقول لا عليه أو على أي نوع تاني من الأكل.



 

Comments: