في الذكرى العاشرة لثورة 25 يناير.. سألنا الناس كنتوا فين يومها؟

25/01/2021

في الذكرى العاشرة لثورة 25 يناير

سألنا شباب كنتوا بتعملوا إيه يومها وعرفتوا إزاي إن في ثورة.. ودي كانت إجاباتهم!
 

آية:

كنت في تانية ثانوي وكان عندي درس تاريخ وصحابي اللي في علمي كان عندهم امتحان كيمياء وكنا متفقين نخرج مع بعض، بس قالولي لا مش هينفع عشان في مظاهرات في الشارع

أمنية:

أنا كنت بره مصر في "التشيك" وماكنتش فاهمة حاجة، ومش عارفين نوصل لحد في مصر عشان النت اتقطع، والناس سكان البلد لما عرفوا إننا مصريين كانوا بيقعدوا يسألونا في إيه، وبعد كده بقوا بيتابعوا الأخبار ويتفرجوا عالميدان في التلفزيون

وفاء:

كنت في اسكندرية بحضر كتب كتاب قريبتي، وكنا رايحين كارفور نشتري حاجات وفجأة واحنا في الطريق شفنا ناس كتير بتجري ومكناش فاهمين في إيه، وافتكرنا إن دي خناقة في الشارع، وروحنا قعدنا عند قرايبنا ورجعنا القاهرة بعدها بيوم وكنا بدأنا نفهم إيه اللي بيحصل

مصطفى:

كنا حاجزين كورة أنا وصحابي عشان كان عندنا امتحان وكنا هنلعب بعدها، بعد كده لما خلصنا قالولنا في قلق فروحنا بيت واحد صاحبنا على أمل إن اللي بيحصل ده يخلص بسرعة ونروح نلعب كورة، وأهالينا كانوا بيكلمونا يطمنوا علينا قولنالهم إحنا قاعدين ومانعرفش إيه بيحصل بره، ومفهمناش إيه اللي بيحصل غير تاني يوم

محمد:
كنت قاعد متابع اللي بيحصل في التلفزيون وماكنتش مصدق إن ده حقيقي وأول ما اتأكدت خدت بعضي ونزلت على طول من أول يوم

يمنى:

أنا كنت نايمة وصحيت على صوت المظاهرات لأني ساكنة قريب من كوبري الجلاء ومكانش ساعتها في حاجة في التلفزيون فمفهمتش إيه اللي بييحصل ده، بس عرفت يومها بالليل لما الأخبار بدأت تغطي المظاهرات 

بسمة:

كان عندي امتحان في الجامعة وأجلوه ليوم الجمعة 28، عشان قالوا إن يومها في مظاهرات ومحدش فينا كان فاهم حاجة وكنت متضايقة بس عشان كنت عايزة أخرج آخر يوم امتحانات والخروجة اتلغت

أحمد:

كنت باكل على عربية فول الصبح وسمعت الناس بتقول إن في مظاهرات النهاردة، وإنهم هينزلوا روحت البيت نمت وقلت أكيد مش هيحصل حاجة، صحيت لقيت البلد مقلوبة ونزلت بعدها

Comments: