٧ طرق مناخيرك بتأثر على حياتك بيهم 

26/01/2021

دايما الروايح بتخليك تفتكر مكان أو حد أو فترة في حياتك، بتأثر على مزاجك سواء تأثير إيجابي أو سلبي، فالروايح ومناخيرك عامل وتأثير كبير في حياتك حتى لو مالحظتش ده قبل كده، ووفقا لـ SIRC فمستقبلات الشم عن البني أدمين من 5 لـ 6 مليون مستقبل بس في حين إن الأرانب عندها 100 مليون مستقبل شم والكلاب 200 مليون.

بس الـ 5 أو 6 مليون اللي عند البشر كفاية للسيطرة على حياتهم، وليهم تأثير كفاية برضه على حياتك، موقع Bright side قال في مقال من مقالاتة إزاي حاسة الشم أو مستقبلات الشم والروايح بتأثر على حياتنا وعلى عقلنا ومواقفنا:

1- بتساعد الشخص يتذوق الأكل:

حاسه الشم هي اللي بتخليك تحس إذا كان الأكل حادق أو مر أو حامض أو حلو، لإن المناخير هي اللي بتعرف إذا كان الأكل حلو ولا لا، خصوصا لما بنبدأ نشم وناكل فبيتم إرسال رسايل من مستقبلات الشم والتذوق لعقولنا عشان تأكد إذا كان الأكل لطيف أو لا.

2- بتخليك تنجذب للناس:

أغلبنا بنشتري عطور أو "برفيومز" عشان نبقى أكتر جاذبية، لكن اللي مانعرفهوش فعلا إن مش الروايح نفسها اللي بتخلينا جذابين، لكن فيه دراسة حديثة أظهرت إن العطور بتخلينا واثقين في نفسنا أكتر وده اللي بيجذب الناس لينا.

3- بتخليك تسافر بالزمن:

بالرغم إنها حاجة "كليشية" لكنها حقيقية، لإن الروايح بتثير الذكريات والعواطف المرتبطة بذكريات معينة، وبتخلي عقلنا عايز يرجع بالماضي، وفيه عدد كبير من الدراسات العلمية وضخ إن الروايح بتنشط الذكريات العاطفية أكتر من الصور، خصوصا كمان إن الشخص بيفقد 50% من ذاكرته البصرية خلال شهور بس معظم الذكريات المرتبطة بروايح بتفضل موجودة حتى لو بعد سنين.

4- بتأثر على مزاجك:

غير إن الروايح بتخليك تسترجع ذكريات فهي كمان بتثير المشاعر والحالات المزاجية، وده بيحصل في اللاوعي في مخنا، يعني مثلا في بعض الأوقات بنبقى مش فاهمين إحنا قلقانين أو غضبانين ليه لكن لو شمينا روايح ممكن نهدي زي الشمع المعطر مثلا، وللسبب ده فيه علاج بالروايح لإن فيه روايح بتخلينا سعداء أكتر.

5- ممكن تخليك تتضايق:

الأشخاص اللي قدرتهم على الشم منخفضة هما عرضه أكتر للإصابة بالاكتئاب، وده بيحصل بسبب العلاقة القوية بين الروايح والعواطف، وعدم القدرة على تجربة روايح مختلفة بيخلي الشخص قدرته محدودو في استعادة الذكريات والمشاعر، وفيه بعض الأراء بتقول إن انخافض حاسة الشم مرتبط بالانفصام.

6- بتخليك قادر تقرأ الناس:

ممكن تحس بمشاعر الشخص اللي قدامك من خلال ريحتهم، بمعنى لو كان الشخص اللي قدامك خايف مثلا هيعرق وده هيقول لعقلك إنه خايف.

7- بتخليك تشتري أكتر:

بيحصل لكل شخص فينا عملية غسيل مخ عن طريق مناخيره، خصوصا إن فيه محلات بتحط روايح أكتر للحاجات اللي بتبيعها عشان تشتري أكتر، زي محلات القهوة أو الأفران، لإنهم بيبقوا عارفين إن الروايح دي هتقنع دماغنا تلاقئي حتى لو مش جعانين إننا نشتري، ماتنساش تبقى تتحجج بالمعلومة دي المرة الجاية لما تشتري أكل زيادة أو لما تتخن.

يمكن حاسة الشم مفيدة وحيوية ومهمة، مش بس بتساعدنا إننا نفتكر مشاعرنا والأوقات الحلوة اللي عدينا بيها، لكن برضه بتوفر حيل تسويقية بتساعد الاقتصاد العالمي.

Comments: