للمبتدئين: اعرف أهم أساسيات كرة اليد عشان تعرف تشجع مصر

27/01/2021

كلنا متفقين إن كرة القدم هي الرياضة الأكتر شعبية وانتشاراً خصوصا في أفريقيا، لكن بعد تنظيم مصر لكأس العالم لكرة اليد 2021 أغلب المصريين بدأوا يتابعوا أخبار كرة اليد ويتفرجوا على الماتشات خصوصا بعد تأهل مصر لدور الربع نهائي وحماس المصريين اللي زاد عشان  منتخب مصر بيلعب وعامل مجهود كبير في الماتشات اللي لعبها.

بس كرة اليد باين من اسمها إن الرياضة بتعتمد على الكرة بس اللاعبين بيلعبوها بالإيد مش بالرجل زي كرة القدم، وهي لعبة جماعية بتتلعب بين فريقين كل فريق بيبقى مكون من 7 أفراد واحد منهم بيبقى حارس مرمى، وبتتلعب في صالات مغطاة مش مكشوفة زي كرة القدم، ووقت المباراة بيكون 60 دقيقة كل شوط 30 دقيقة.

كل دي معلومات في البداية لازم تعرفها عن كرة اليد، لكن لو عايز تعرف أهم قواعد اللعبة وتتابع ماتشات مصر بجدية خلينا نقولك قوانين اللعبة:

1- من أهم قوانين اللعبة إن اللاعب يستخدم إيده بس عشان يحرك الكرة وممنوع نهائيًا يستخدم رجله، وإن اللاعب يقدر يمسك الكرة بايده خلال 3 حركات بس ولازم يمررها للاعيب تاني بعد كده.

2- احتياطي كل فريق من الفريقين لازم يكون 5 أشخاص.

3- تشكيل فريق كرة اليد بيبقى عبارة عن لاعب وسط ولاعب خلفي، وباك يمين وباك شمال وحارس مرمى.

4- لازم يكون فيه حكمين بيحكموا في مبارايات كرة اليد.

5- مساحة الملعب اللي بتتلعب فيه كرة اليد بتبقي  40 متر طول و20 متر عرض ولازم يكون على شكل مستطيل.

6- ممكن تحصل عملية تبديل للاعبين في أي وقت خلال الماتش.

7- كل شوط زي ما قولنا مدتة 30 دقيقة بمعنى إن وقت المباراة 60 دقيقة ومابيتمش حساب الوقت بدل الضايع في اللعبة دي.

8- كرة اليد نفسها لازم تكون بتلمع وملساء 

9- كل لاعبين الفريق يقدروا يهجموا على الفريق التاني ماعدا حارس المرمى ومهمته هي حراسة المرمى بس.

10- بيتم طرد أي لاعب عمل غلط لمدة دقيقتين كعقاب فوري أثناء اللعب  

11- يقدر الحكم يطرد أي حد من اللاعبين في حالة قيام اللاعب بالاعتداء على لاعب تاني أو تعمده إنه يضيع وقت في المباراة.

12- فيه بعض المواقف اللي ممكن يتوقف فيها اللاعب زي إنه يدافع بطريقة عنيفة أو بطريقة غير مسموح بيها، أو احتجاج اللاعب على قرار الحكم مثلا 

13- فيه 4 أنواع من الرميات في كرة اليد وهما (رمية جانبية، رمية مرمى، رمية جزاء، رمية حرة).

14- في حالة تعادل الفريقين بيتم لعب شوطين إضافيين لمدة 10 دقايق كل شوط 5 دقايق وبينهم استراحة دقيقة ولو اتكرر التعادل بيبقى فيه ركلات ترجيح لتحديد الفريق الفايز

Comments: