١٠ علامات بتدل على أشخاص بيمارسوا "التلاعب النفسي" عليك.. وإزاي تتصرف معاهم؟

30/01/2021

كتب: محمود عادل

زي ما قريت في العنوان، كلمة "المتلاعبون" أو بمعنى أصح اللي بيعرفوا يقلبوا الترابيزة على اللي قدامهم، ولكن خلونا نتكلم باستفاضة أكتر: الشخص التلاعبي هو شخص طول الوقت بيدور على الناس يقدر يستخدمهم عشان يحقق أو يوصل للي هو عايزه ومش مهم الوسيلة أو الطريقة، يعني بيلعبوا على مشاعرك وبيتحكموا فيك، وغالبا الموضوع بيكون مش ظاهر وخصوصا لو بيتعاملوا معاك مباشرة وأنت شخص بتتعامل بحسن نية ومش بتقف مع نفسك وتسألها.

ولذلك، دول 10 علامات عن "الشخص المتلاعب" حسب موقع healthline:

- بيقربوا بسرعة منك، يعني بتلاقي العلاقة واخدة الطريق السريع ومش بتمشي زي أغلب العلاقات التقليدية، وبيشاركوا معاك أسرارهم ونقط ضعفهم، وده بيخليك تشعر إنك مميز عندهم عشان تكشف أسرارك عشان يقدروا يستخدموها ضدك في المستقبل، وهتلاقي كلام من نوعية "أنا عمري ما قابلت حد زيك، أنت كذا وكذا وكذا" وكلام من النوع ده.

- خبراء وأساتذة في قسم الكذب والتحوير وتحريف الحقائق، يا إما يبالغوا أوي في الأحداث عشان يحسسوك إنهم في خطر أو يبينولك قد إيه هما غلابة عشان تتعاطف معاهم.

- دايما بيحسسوك إنهم أحسن منك، وكأنهم بيدوك من معرفتهم الكبيرة جدا وأنت مش بقى الغلبان ومش فاهم.

- بيعلو عليك، بمعنى لو قولتله أنا النهاردة كان عندي شغل كتير وروحت تعبان يقولك لا أنا بقى كان عندي أكتر وروحت تعبان أكتر منك، وده عشان تركز عليهم وتحل معاهم مشاكلهم.

- بيحشو الهزار في الكلام بشكل لئيم، بمعنى إنه ممكن في وسط قعدة يقولك إيه كرشك ده؟ وكلام من هذا القبيل ولما تيجي تلومهم يقولوا: "أنا كنت بهزر متبقاش قفوش وعيوطة" وده بيخلي جواك شك وتبقى فعلا حاسس إنك شخص أوفر.

- مش بيشيلوا مسؤولية أخطائهم، وطول الوقت هيحسسوك إنك المشكلة من عندك أنت لحد ما تقول أنا أسف وأنت فعليا معملتش حاجة.

- النقطة دي ممكن تبقى متصلة بنقطة "التعلية عليك"، يعني لو كنت فرحان هيحاولوا يكتشفوا حاجة في الموضوع تنكد عليك، ولو كنت حزين أو عندك مصيبة هيحسسك إن المصيبة مش كبيرة أوي، زي إنك تفقد وظيفتك، فا الشخص ده هيقولك ده أنا فقدت وظيفتي وبيتي وحياتي وبناتي وولادي عشان يحسسك إنه عادي يعني!

- دايما بيلوموك أو بيقللوا منك أو من أي حاجة تعملها، وتسمع كلام من نوعية "إيه التفاهة اللي بتعملها دي" أو "أنت طول اليوم مبتعملش حاجة غير إنك بتأكل" وكلام بيكون مضمونه إنهم يقللوا من قيمتك.

- ممكن فجأة يبطلوا يردوا على مكالماتك أو رسائلك، فا ده يخليك تتسأل أنا عملت إيه؟ وأنت فعليا معملتش حاجة بس هما اللي للأسف كدة!

- النقطة دي بتربط مع نقطة سابقة المتعلقة بالكذب والتحوير، يعني ممكن يقولوا حاجة ويرجعوا يقولوا لا محصلش ولا مقولتش وده أسلوب بيستخدموا عشان تبدء حتى تشك في ذاكرتك وساعتها أنت هتحس إنك مش فاكر وساعتها وبكل السهولة يقدروا يشيلوك الغلط لحد ما بردو تعتذر عن حاجة هي حرفيا محصلتش ولا ذاكرتك افتكرتها بس هما قدروا يأثروا عليك.

طيب تتصرف إزاي معاهم؟

للأسف أنت ممكن متبقاش مدرك في لحظة وجودك في العلاقة دي، والتصرفات دي بتبقى متقنة وبتتطور مع الوقت ولو أنت شايف إنك تعرضت لحاجات زي دي فا خليك واثق في نفسك.

ولذلك فا أنت محتاج تقطع من سكات وتمشي من غير ما تشرح أي حاجة ومتردش على أي اتهامات هتجيلك لإن ده أسلوب الشخص المتلاعب لما بيحس إنه بدأ يفقد السيطرة وبيبدأ ينمي أساليبه.

لو أنت عايش مع شخص زي كدة أو بتشتغل معاه عن قرب فا أنت محتاج تتعلم إزاي تتعامل معاه، ولو مش مضطر إنك تتعامل معاه فا الأفضل إنك تطلعه برا حياتك تماما.

وحاول تتكلم مع شخص مختص زي معالج نفسي عشان تقدر تتعامل مع الوضع ده.

وممكن تطلب مساعدة من صديق بتثق فيه عشان يساعدك تحدد سلوك الشخص ده وتحط حدود.

Comments: