إجراءات جديدة من Call Of Duty لمحاربة الهاكرز وبرامج الغش

03/02/2021

كتب: محمود عادل

في الفترة الأخيرة، عدد كبير من لاعبين Call of duty قرروا التوقف عن لعبها بسبب وجود عدد كبير من الهاكرز واللي بيطبيعة الحال ده بيفقد اللعبة متعتها.

وإمبارح، أحد الأستريمرز قرر إنه هيتوقف عن اللعبة، وهو واحد من الأستريمرز التُقال والمعروفين عالميين، إحنا مش عارفين هل ده له علاقة ولا لا.. بس حساب COD على تويتر، نشر تويتة بيقول فيها إنه قام بحظر أكتر من 60 ألف حساب في يوم واحد بس واللي هو إمبارح، ونشروا بيان قالوا فيه: "قمنا بحظر 60 ألف حساب لحالات مؤكدة بتستخدم برامج للغش وده خلى عدد الحسابات المحظورة وصل لـ300 ألف من جميع أنحاء العالم من بداية اللعبة".

وتم أيضا حظر 180 ألف حساب كان مشتبه فيهم، وده بيؤكد على إن فريق اللعبة بدأ يركز في الموضوع وياخد في تحركات مهمة.

وأضافوا في بيانهم: "بنواصل جهودنا لمحاربة الغش وبنوعد بتقديم تجربة ممتعة للاعبين" بالإضافة إلى إنهم اتخذوا كذا إجراء للموضوع زي تحسينات داخلية لمكافحة الغش وتقنيات إضافية لاكتشافهم وتحسين آلية الإبلاغ عن الهاكرز والفرق المختصة في الموضوع عددهم هيزيد، مع زيادة آليات مخصصة للمراقبة والحظر.

والبيان قال إنهم هيتخذوا إجراءات ضد المواقع والناس اللي بيقدموا برامج الغش مش مجرد اللاعبين اللي بيستخدموا البرامج ده.

ونهاية البيان كانت بجملة: "لا مكان للغش.. وجهودنا مش هتتوقف".

Comments: