إزاي تحمي نفسك من الاختراق وأفلام عنه

09/02/2021

العالم بقى حرفيا قرية صغيرة بعد ظهور الإنترنت، بقت كل حاجة أسرع زي التواصل ونقل المعلومات وفي نفس الوقت الاختراق سريع لدرجة إنك مش هتلحق تكتشف إن تم اختراقك وكل ما بيطلعلنا اختراعات جديدة في الإنترنت والعالم بتاعه كل ما أساليب الاختراق بتتطور لدرجة تخليك تقول وه!

هنقولكم على نصائح بسيطة حسب موقع clubb عشان تتجنب الاختراق "غير طبعا إنك تحط ستيكر على الكاميرا" لإن محدش مهتم يصورك ويساومك على صور أو فيديو أنت فيها!

1- متدخلش على واي فاي عام

الشبكات اللي بتبقى موجودة في الشارع أو المطاعم بتبقى غير آمنة، لإن سهل جدا أي مخترق قاعد معاك على نفس الشبكة، ممكن يتاخد الكريدت كارد بتاعك لو مسجله في ويب سايت أو على البراوزر.. يعني ده زي تثبيت في الشارع بس إلكتروني.

2- وقف أي حاجة مش بتستخدمها

المخترق ممكن يستخدم حاجات على جهازك زي الـGPS عشان يخترقك، مش معنى كدة إنك تتوقف عن استخدامها وتفضل قافلها على طول، بس الفكرة إنك تفتحه لما تكون محتاجه بس.

3- متعملش داونلود لأي أبلكيشن معدي قدامك

لما تعمل داونلود لأبلكيشن يكون من مصدر موثوق فيه، زي متجر جوجل أو آبل أو مواقع معروفة وموثوق فيها، لإن سهل جدا وشوفنا ده في أفلام كتير، يرميلك أي فيروس في الفايل، الجيمرز على سبيل المثال بيعانوا من مشاكل زي دي لما بيحاولوا ينزلوا ألعاب بشكل غير شرعي "وده عيب ها" فا بيلاقوا فيروس نزل مع اللعبة وبيكون محطوط بشكل مقصود وفي ثواني بيكون جهازك تحت سيطرة المخترق وساعتها بيلعب فيه براحته بس الموضوع المنتشر أكتر وخصوصا لو أنت بتستخدم لاب توب أو بي سي في شغلك كتير، بتتقفل كل ملفاتك بامتداد* معين لحد ما تدفع مبلغ بيطلبه المخترق

*امتداد زي JPG أو MP4

4- متفتحش أي فايل يجيلك

بص لو أخوك إبن أمك وأبوك بعتلك فايل أو لينك مجهول متفتحهوش، لإن غالبا المخترق لما بيخترق واحد بيلف على باقي صحابه، ولذلك كن حذر لإن ضغطة غلط على لينك غلط ممكن تكلفك كتير.

5- فعل خاصية التتبع

لو لقدر الله جهازك اتسرق تقدر تجيبه عن طريقة خاصية التتبع أو إن جهاز يقفل بعد عدة محاولات فاشلة لفتحه وساعتها بيكون حتة حديدة في إيد اللي سرقه

6- باسوردك ثم باسوردك

الباسورد لازم يكون صعب، يعني بيتكون من حروف وأرقام ورموز، وميكونش بيتضمن اسمك ولا تاريخ ميلادك ولا أي حاجة ليها صلة بيك، ولا يقل عن 10، لإن أغلب الاختراقات بتحصل من توقع الباسورد ولكن ده هينقلنا لنقطة تانية.

7- التحقق بخطوتين

هنفترض إن في واحد محنك توقع باسوردك وقدر يدخل حسابك، لما بتفعل خاصية التحقق بخطوتين أو عن طريق موبايلك ودي بقت متوفرة في أغلب الأبلكيشنز والمواقع، وفكرتها إن محدش يقدر يدخل حسابك غير لما يدخل الكود اللي جاله على الموبايل، ولذلك موبايلك في إيدك طول الوقت ولو لقدر الله اتسرق ولا راح في أي حتة، هتطلع على الشريحة اللي مسجل بيها في المواقع دي وتقدر ترجعها بسهولة، لإنه حتى لو فتح الموبايل ودخل على أي أبلكيشن وحاول يشيل خطوة التحقق هيطلب منه الباسورد بردو

8-اهتم بالتحديثات
التحديثات اللي بتتبعت من الشركة المصنعة لجهازك سواء موبايل أو لاب توب أو أي جهاز عموما بتكون مهمة، بعيدا عن إضافة خصائص كويسة ولكن ساعات بيكون التحديث بيقفل ثغرة الشركة اكتشفتها وبعتت التحديث ده عشان تقفلها.

9-برامج الحماية
لازم يكون عندك برنامج من البرامج اللي بتحميك من الفيروسات، واللي ليها أشكال كتير زي إن الجهاز يبطء أو بياناتك تدمر، البرامج دي مهمتها إنها بتفحص أي ملف بينزل على جهاز وبتسمح بتنزيل الملفات الأمنة وتمنع نزول الملفات الضارة واللي فيها فيروسات، وباستمرار اعمل فحص أو Scan باستخدام البرنامج على جهاز كله عشان يشوف لو في أي ملفات ضارة نزلت على جهاز بالغلط وبالتالي البرنامج هيتخلص منها.

10-متدوسش على أي حاجة
مفيش حاجة هتعرفك باسورد الواي فاي، ولا مين بيبحث عنك على فيسبوك، ولا مين يشبهك من الفنانين، ومفيش بنك هيبعتلك عايزين كلمة السر عشان حسابك اتقفل، فكر كويس جدا وأنت بتقرأ أي رسالة أو إيميل، يعني فيسبوك لما هيراسلك، هيعمل ده عن طريق الإيميل مش عن طريق الرسائل، وكذلك إنستجرام وتويتر وأي سوشيال ميديا تانية، وكمان تأكد من عنوان الإيميل اللي بعتلك، يعني ممكن يكون خداع ومكتوب [email protected]، شكله فيسبوك بس في حرف ناقص وهو الـE وده معناه إن اللي بعتلك مش فيسبوك فعليا وإنما حد بيحاول يخترقك.. ومفيش أي جهة هتطلب منك معلومات شخصية بشكل مباشر عشان تأكد حسابك.

في خطوات معقدة أكتر من كدة بكتير، طبعا حد ممكن يتسأل هو في أكتر من كدة؟ هقولك أه لإن حيل الهاكرز كتير ومش بتخلص والمواقع والأبلكيشنز مليانة ثغرات ياما يا هبة!

دلوقتي هننتقل للفقرة المفضلة عندي، قائمة بأفضل أعمال  من وجه نظري اتكلمت عن الهاكرز، ما بين أفلام ومسلسلات!

فيلم Snowden  

إدوارد سنودن واللي قام بدوره "جوزيف جوردون ليفيت" بيسيب شغله في وكالة الأمن القومي في الولايات المتحدة بعد ما قدر يسرب وثائق سرية، قصة سنودن معروفة للعالم كله بس الفيلم نفسه ممتع وفيه جو توتر ظريف، وكان في مشاهد كتير بتورينا حرص سنودن الشديد من الاختراق، الفيلم ممتع والأمتع إنه قصة حقيقية.

فيلم Who Am I

فيلم ألماني بيتكلم عن شاب اسمه "بنجامين" مهووس بعلم الحاسب الآلي، بينضم لمجموعة مخترقين اسمها كلاي وكان هدفهم لفت نظر العالم ليهم وده حصل لإن الشرطة الألمانية بقت عايزة تقبض عليهم، الفيلم ظريف ومليان مفاجأت وبيورينا الصراعات اللي بتدور في عالم المخترقين وحيالهم الذكية في الاختراق.

مسلسل Mr. Robot

بيتكلم عن "إليوت" اللي بيشتغل مهندس أمن سيبراني في شركة وبليل بيخترق المجرمين، المسلسل حلو ومشوق، بيقوم ببطولته "رامي مالك".

Comments: