القصة الكاملة للبنت اللي استخدمت الغرا بدل مثبت الشعر بتاعها اللي خلص

10/02/2021

انتشر فيديو في نهاية الأسبوع اللي فات على مواقع التواصل الاجتماعي لبنت اسمها "تيسيكا براون" عندها 40 سنة وعايشة في ولاية "لويزيانا" في أمريكا بتحكي فيه قصتها بعد ما مثبت الشعر بتاعها خلص وقالت إنها بتحب بعد ما تسرح شعرها تثبته بمثبت الشعر بتاعها لكن خلص وعشان تثبته زي ما هو استخدمت نوع لزق أو غرا اسمه "غوريلا جلو" وقالت إنها كانت تجربة سيئة أوي وإن الناس اللي يعرفوها عارفين إن شعرها بقاله حوالي شهر بالحالة دي.

ولما لفت شعرها للكاميرا بان إن شعرها كله كأنه خوذة أو كتلة صلبة مابتتحركش، وقالت إنها غسلت شعرها 15 مرة وبرضه مابيتحركش، وقالت في آخر الفيديو لو مثبت الشعر بتاعك خلص أوعى تستخدم غرا على شعرك إلا لو مش عايز شعرك يتحرك للأبد.

"تيسيكا براون" استخدمت الغرا على شعرها بالرغم إنه مكتوب عليه إن بيتم استخدامه للقماش والخشب ومكتوب كمان عليه تحذير من انه يلمس الوش أو العين لإن من ضمن مكوناته " الأسيتون والبروبان" اللي بيسببوا التهاب وهياج للجلد وممكن يشكلوا خطر، لكن مش مكتوب أي تعليمات عن الشعر.

وبعد أيام من استخدام اللزق قررا "تيسيكا براون" تستخدم منتجات كتير عشان تفك اللزق من على شعرها زي زيت جوز الهند مثلا ده غير مقتراحات الحلول اللي اقترحها عليها متابعينها على السوشيال ميديا.

وبعد كده نشرت "تيسيكا براون" يوم السبت صورة ليها وهي في طوارئ مستشفى تشالميت في ولاية "لويزيانا" وكان عندها أمل دكتور يساعدها في حل المشكلة اللي هي فيها دي لكنها قعدت في الطوارئ حوالي 22 ساعة وجرب الدكاترة معاها محاولات لتدويب الغرا ده عن طريق مادة "الأسيتون" لكن عمل نتيجة عكسية معاها واتسببت في التهاب فروة رأسها.

وبعدها راحت لكوافير بس ماعرفوش يعملوا حاجة غير إنهم يقصوا باقي شعرها عشان يسمحوا للهوا إنه يتسرب لباقي شعرها، وبعد كده قالت إن زيارة دكتور بس مش كفاية وإنها هتعمل عملية طويلة يوم الأتنين.

وبعدها نشرت شركة شركة صناعة اللزق "غوريلا جلو" على الأكونت الرسمي بتاعهم على تويتر تعليقهم على الحادث وقالوا إنهم مبسوطين إن "تيسيكا" طلبت المساعدة الطبية ووضحت إن الشركة إن الوضع ده جديد وفريد من نوعه خصوصا إن المنتج مش موصوف للشعر خالص.

وطلت "تيسيكا براون" عن طريق موقع "جوفندمي" من الناس إنها تتبرع لهم عشان تقدر تغطي تكلفة علاجها وجمعت فعلا أكتر من 15 ألف دولار يوم التلات الموافق 9 فبراير 2021.

وراحت "تيسيكا براون" لوس أنجلوس عشان تقابل جراح تجميل اسمه "مايكل أوبينج" وهو اللي هيشيل الغرا من شعرها وهو اللي قدم الخدمة دي مجاناً ليها، وعرضت مصففة شعر "بيونسية" "نيل فارينا" إنها تساعدها.

الجدير بالذكر إن أكونت " تيسيكا براون" على تيك توك بقى عليه حاليا 800 ألف متابع وعلى إنستجرام 700 ألف متابع.

Comments: