في عيد الحب.. سألنا الناس هل نفسكم ترجعوا سينجل؟

14/02/2021

كتب: محمود عادل

عيد الحب بيكون يوم مميز في العالم، وفي مصر تحديدا ولكن الناس السنجل بياخدوه في طريق الميمز والسف على المرتبطين وإن قد إيه الحياة بتكون وردية مع الناس المرتبطين سواء صحوبية أو خطوبة أو جواز.. ولذلك قررنا نسأل ناس متجوزين هل إنتوا مبسوطين في حياتكم ولا نفسكم ترجعوا سنجل؟ والأهم لماذا في الحالتين؟

أحمد أبو المجد (27 سنة) - متزوج

مبسوط في جوازي بس معرفش ليه! لإن السؤال عن الجواز عامل زي الحب، ممكن يقول 100 سبب عن ليه بيحب شخصا ما وممكن يقول من غير سبب، فا الجواز كدة خصوصا لو عن حب فا بيكون له أسباب كتير زي الراحة النفسية ومسؤولية جميلة والأمان والاستقرار والاحترام وتحقيق الذات والحب، وأي حد يقولك مش مبسوط في الجواز كداب لإن اللي بيجرب حاجة حلوة حتى لو للحظات عمره ما هيرجع للي قبل كدة، زي ما تقول وحشتني أيام الدراسة بس أنت مش هترجعلها، فا اللي جرب الجواز والحب عمره ما يرجع للي فات والجواز أهم حاجة خصوصا قبل سن الـ30.

ج.ه (28 سنة) - متجوزة

مبسوطة والحمدلله بس ساعات بحس إني عايز أخنق جوزي ومش طايقة أشوف وشه بس ساعات ببقى حاسة إني أكتر واحدة محظوظة في العالم إني إتجوزتوه وساعات ببقى عايزة ارجع سينجل عشان أبقى من غير مسؤوليات وأبقى حُرة بعمل اللي أنا عايزاه من غير ما حد يقولي إيه وليه.

س.ط (29 سنة) - متجوزة

بالنسبالي أول سنة كانت جحيم لأننا مكناش فاهمين بعض في كل حاجة وبعدين بدأنا نعرف إزاي نتعامل مع بعض، والدنيا أصلا فيها هم وتعب والبني أدم بيبقى محتاج شريك يتخطى معاه تعب الحياة ويستمد الطاقة منه، ساعات بنرازي في بعض بس الجواز مرونة يعني مرة هو يعدي ومرة أنا أعدي على حسب مين عنده طاقة أكتر وقتها وبردو الموضوع بيرجع لتقدير الموقف، وأي جواز ناجح يببقى نتيجة تعب الشريكين ولو فشت بتبقى بردو بسبب الأتنين وأحيانا ممكن تبقى من طرف فيهم ونتيجة تراكمات.

حازم فايد (27 سنة) - مرتبط

الواحد محتاج شريك في حياته والأهم إنه ميكنش مزيف لإن المزيفين كتير الفترة دي وميكونش عامله ضغط في حياته، شريكتي مش عملالي ضغط وبتحس بيا في الأوقات المختلفة، وفا محبش أبقى سنجل.

شاهندا عماد (23 سنة) - مخطوبة

مينفعش الواحد يفضل عايش لوحده، لازم يبقى معاك حد ومش لازم تكون بتحب فيه طول الوقت، ممكن تبقوا بتتخانقوا بس هو إحنا مخلوقين منقدرش نغيش لوحدنا أيا كان راجل أو ست، إزاي الست تعرف تحس إن في حد طول الوقت بيتطمن عليها وبيدعمها وشايل من عليها المسؤولية، والعكس بردو، اهتمام الست بالراجل بكل التفاصيل الصغيرة.. حتى الغيرة بتبقى مطلوبة، فا محبش ارجع سينجل بعد وجود شخص بتشارك معاه كل حاجة في يومك سواء الحلو أو الوحش والقرارات السهلة والصعبة.

Comments: