إيه هو مرض عمى الوجه؟

17/02/2021

كتب: محمود عادل

عمى الوجه أو Face blindness هو اضطراب في الدماغ، بيخلي المصابين بيه ميقدروش يتعرفوا على الوشوش أو يميزوها.

يعني بيعاني الأشخاص المصابين به إنهم مبيقدروش يلاحظوا الاختلافات في وجوه الناس الغرباء عنهم، أو إنهم يعرفوا وجوه الناس المقربين منهم.

والموضوع حتى بيوصل لصعوبة في التعرف على وجوه الناس من العائلة والأقارب لو الحالة في درجة متوسطة، أما لو المرض في حالة صعبة، الشخص ممكن ميتعرفش على وشه هو شخصيا!

طيب إيه اللي بيسبب عمى الوجوه؟
ده بيحصل نتيجة ضعف أو تلف في منطقة معينة في الدماغ ودي المسؤولة عن التذكر الوجوه وإدراكها.

وأحيانا المرض ده بيسبب السكتة الدماغية أو بعض الأمراض العصبية.

هل المرض ده منتشر؟
هو أكثر شيوعا ما بين مرضى التوحد، وللأسف المرض ده بيعيق التواصل الاجتماعي أو تكوين علاقات.

ومعلومة مهمة جدا، في فرق بين مرض عمى الوجوه وبين فقدان الذاكرة، لأن مرضى عمى الوجوه مش بيشوفوا الوجه بشكل كامل، يعني بيكون الوش اللي قدامهم عبارة عن فم وأنف وعيون بس، والمرض ده مش بينتج عن ضعف البصر أو فقدان ذاكرة.

طيب لو حد عنده المشكلة دي يعمل إيه؟
أول حاجة إنه يتوجه لطبيب أعصاب ومن عنده هو هيوديه للمكان المناسب، متحاولش تعمل أي تيست على الإنترنت لإنها غير دقيقة، الأفضل والأنسب هو إنك تروح لدكتور.

هل في علاج للمرض ده؟
للأسف لا، ولكن في بعض الآليات المستخدمة في العلاج زي التركيز على سلوكيات الناس وشعرهم وأسلوبهم في الكلام، كل ده مع الوقت بيخليك تتعرف على الأشخاص ولكن الباحثين حسب موقع healthline شغالين على فهم أسباب محددة للحالة المرضية دي للخروج بعلاج ليها.

Comments: