إزاي تربيتك لحيوان أليف هتخلي حياتك أحسن؟

18/02/2021

مع كل شتا أو موجة برد بتظهر دعوات كتير إن الناس تتبنى قطط أو كلاب الشوارع عشان تحميها من البرد والمطر، لو بتفكر تعمل ده بس لسه متردد أو لو نفسك تربي حيوان أليف ومش عارف تقنع أهلك خليهم يقروا الموضوع ده

أولًا خلينا نقولك إن تربية حيوان أليف في بيتك من اي نوع، هيفيدك أكتر ما هيفيد الحيوان، إنت هتقدمله بيت وأكل وشرب بس هو بقى هيقدملك الحاجات دي

1- تقليل معدلات التوتر والقلق 

في تجربة أجراها الباحثين بموقع Emotional Pet Support على 200 شخص مصابين بالاكتئاب واضطرابات نفسية تانية، لقوا إن بعد فترة من تربيتهم لحيوانات أليفة، زادت نسبة هرمون الأوكسيتوسين، واللي بيطلق عليه هرمون الحب، وقلة نسبة هرمون الكورتيزول واللي بيطلق عليه هرمون التوتر

2-صحة أحسن 

في أكتر من دراسة على مرضى الضغط المرتفع اكتشفوا إن تربية حيوان أليف بتساعد على الحفاظ على ضغط الدم في معدلاته الطبيعية، وفي بحث تم اجرائه في الصين سنة 2017 إن تربية الكلاب بتقلل فرص الإصابة بتصلب الشرايين والنوبات القلبية بنسبة 30%، وبتساعد على رفع اللياقة لأن الكلاب بتحتاج للمشي  والحركة يوميًا

3- المساعدة في تربية الأطفال 

وجود حيوان أليف في بيت موجود فيه أطفال، بيعلمهم الرحمة والمسؤولية وتعليمهم بعض المهارات الحركية بشكل أسرع، وبيساعد في حالات الأطفال المصابين بالتوحد أو ضعف التركيز أو النشاط الزائد

4- تنبيهك للمشاكل الصحية 

الكلاب بتشعر بالروائح أقوى بأربعين مرة من الانسان، والخلايا السرطانية لما بتصيب الإنسان بتنتج ريحة الكلاب بتقدر تميزها، ووجدت بعض الدراسات إن في بعض السرطانات زي سرطان البروستاتا الكلاب بتقدر تميزه  بنسبة 93% وتنبه صاحبها بوجود مشكلة صحية

5- المساعدة في تخطي الصدمات 

في أمريكا بيستخدموا الحيوانات الأليفة في علاج الجنود من اضطرابات ما بعد الصدمة، أو الأشخاص اللي اتعرضوا لحوادث كبيرة أو فقدوا شخص عزيز عليهم
وكانت النتيجة إنهم لقوا إن تربية حيوان أليف ساعدت في رجوع الأشخاص لحياتهم الطبيعية بشكل أسرع وقللت من الرغبة في الانتحار، لأنهم شعروا بمسؤولية تجاه الحيوان وده كان دافع بالنسبة لهم

لو كل الأسباب العلمية دي مأثرتش فيك خلينا نقولك إن الحيوانات هتقدملك حب غير مشروط عمرك ما هتلاقيه في حياتك  مع أي انسان غير أمك بس، وعندها استعداد تفديك بعمرها لو حست إنك بتتعرض لخطر، يعني برضه أحسن من ناس كتير عرفتها في حياتك، مستني إيه قوم اتبنى حيوان أليف يلا!

Comments: