إزاي تحافظ على كميات المياه اللي جسمك محتاج يشربها في الشتاء

18/02/2021

الجو الساقعة اللي بنعيش فيه الفترة دي بيبوظ نظامنا في الأكل والشرب وجفاف البشرة وحاجات كتير، وده لإن إحساس الشخص بالعطش بيقل بسبب البرد، وطبعا بسبب قلة المياه ده بيسبب مشاكل في الكلى وجفاف في البشرة ومشاكل صحية كتير، بس برضه ضروري إنك تحافظ على كميات المياه اللي بتشربها زي اللي كميات اللي بتشربها في فصل الصيف، وده لإن الجسم بيفقد كميات من المياه زي اللي بيفقدها في الصيف برضه بسبب اللبس التقيل وبسبب ارتفاع معدل الحرق.

قلة المياه بتسبب الدوخة والصداع وتشنجات عضلية ومشاكل في الكلى وجفاف البشرة وغيرهم من مشاكل صحية، خلينا نقولك على شوية خطوات تعملها عشان تشرب كميات مياه أكتر زي ما قال موقع "forbes":

1- حدد كمية المياه اللي هتشربها:

أسهل طريقة عشان تشرب بيها مياه هي إنك تحدد كمية المياه اللي هتشربها حتى لو عن طريق أبلكيشين هتنزله على موبايلك يفكرك تشرب، أو ممكن تخلي معاك طول الوقت إزازة مياه مليانة وتبقى بتاعتك وتقول إنك هتملاها 3 أو 4 مرات في اليوم.

2- دفي المياه:

بدل ما تجبر نفسك إنك تشرب مياه باردة في الساقعة وتسقع أكتر ممكن تدفي المياه أو تشرب مشروبات سخنة زي الشاي الأخضر أو الأعشاب وهوت تشوكليت، ولو بتشرب أي كحوليات حاول تقلله لإنه مضر للبول وبالتالي بيزود الجفاف.

3- كل أكل فيه سؤال:

كل أكلات فيها سوائل زي البرتقان والشوفان والكنتالوب والكرفس والفرولة والزبادي أو اشرب شربة مثلا عاملها في البيت فيها خضار عشان تساعد إنك تدفى وفي نفس الوقت تغذي جسمك وتساعد على ترطيبه، وقلل من الأكلات المقلية والمعجنات زي البطاطس المحمرة والبيتزا والعيش عشان بتمتص من رطوبة الجسم.

4- البس هدوم قابلة للتنفس:

خلي نوع الهدوم اللي هتلبسها يبقى زي القطن أو أي قماشات تخلي مسام الجسم قادرة تتنفس بدل الصوف عشان تقلل فقد المياه أو العرق.

5- اشرب مياه وأنت بتتمرن:

خليك عارف إن كل ما زادت كميات العرق بتاعتك كل ما جسمك هيحتاج لترطيب أكتر، عشان كده بينصح انك تشرب كوباية مياه لكل 10 دقايق في التمرين عشان ترطب الجسم وتعوضه عن العرق، وممكن بدل ما تشرب كمية كبيرة من السوائل مرة واحدة قسمها على دفعات من ساعتين لـ 6 ساعات بعد التمرين.

أهم حاجة حافظ على كميات المياه اللي بتشربها حتى لو مش حاسس إنك عطشان عشان جسمك بيحتاج لنفس  كميات المياه الطبيعية في كل الفصول.
 

Comments: