القصة الكاملة لوقف تامر أمين.. وملخص الأزمات اللي اتسبب فيها 

19/02/2021

انتقد الإعلامي تامر أمين في حلقة الخميس 18 فبراير 2021 في برنامجه "آخر النهار" اللي بيتذاع على قناة النهار الزيادة السكانية اللي في مصر حالياً، وانتقد بالأخص الزيادة السكانية اللي بتكون في الأرياف والصعيد، وقال إن أهالي الصعيد بيخلفوا مش عشان يخلوا ولادهم يتعلموا لكن عشان الأولاد يشتغلوا ويصرفوا على أهلهم.

وقال تامر أمين بالتحديد إن فيه نسبة كبيرة من مناطق في الريف والصعيد بيخلفوا ولاد وبنات عشان العيال اللي يصرفوا على الأب والأم، وإن في المناطق دي لما الولد بيتم 6 أو 7 سنين بيسبوه في ورشة عشان يتعلم حرفة وبيتقال عليه "الواد بليه" والأسطى آخر الشهر بيديله 1000 جنيه بيحطهم في حجر أبوه، وكمل تامر أمين وقال "لو الأب خلف بنت هيغلب؟ هيدخلها مدرسة؟ لا، في الصعيد بيشحنوا البنات على القاهرة عشان يشتغلوا خدامات.

وبعد الكلام والتصريحات اللي كانوا مليانين إهانة لأهل الصعيد والأرياف، واجه تامر أمين انتقادات كبيرة جدا على السوشيال ميديا ووصل الانتقاد للبرلمان، وعشان كده النهاردة الصبح الجمعة 19 فبراير 2021 قرر المجلس الأعلى لتنظيم الإعلام وقف برنامج تامر أمين واستدعائه والتحقيق معاه يوم الأحد 21 فبراير 2021 للتأكيد على ضرورة الالتزام بمدونات النشر التي تحض على تعظيم القيم السلوكية والأخلاقية، وأكد المجلس على الاحترام الكامل لأهل الصعيد اللي بيمثلوا الشهامة والمروءة والرجولة.

وبعد قرار المجلس الأعلى لتنظيم الإعلام أعلنت شبكة قنوات النهار في بيان رسمي اعتذارها لجميع أهالي صعيد مصر وريفها في الوجه البحري، بعد الخطأ غير المقصود، اللي كان في برنامج "آخر النهار" على لسان الإعلامي تامر أمين.

وقالت شبكة قنوات النهار إن أهل الصعيد في جنوب مصر وأهل الريف في الوجه البحري برجاله وسيداته هم قوام هذه الأمة وإنهم رموز مصر على مر التاريخ وجاءوا من نبت هذه الأرض الطبية وكانت لهم بصمات كبيرة في كل المجالات، وسيدات مصر هم تاج الرؤوس وإن المجتمع لا يستقيم ولا يقوى إلا بهن"، وحذفت الفيديو المسيء من كل منصاتها تقديرًا لغضب أهل الصعيد وريف مصر.

وبعدها اعتذر تامر أمين لأهل الصعيد عن طريق مقطع فيديو متصور على صفحة قناة النهار على الفيسبوك وقال في الفيديو "متزعلوش مني، وجزمتكم على راسى من فوق، نيتى يعلم بيها ربنا، نيتى خير وكان الهدف هو المصلحة العامة، أرجوكم متزعلوش مني وحتى لو كان قصدي خير بس لو واحد فيكم بس زعلان أنا بقوله حقك عليا وأنا آسف فىي اعتذار صريح، وهذا الاعتذار سينشر في كل مكان".

وقال إنه دايما بيدافع عن الصعايده وبيتبنى قضاياهم وبيطرحها في برامجه على مدار السنين اللي فاتت، وأنه ماقصدش إهانتهم إطلاقاً ولكن قصد يعبر عن حالتهم المادية البسيطة أو الضعيفة اللي بتدفعهم إنهم يدوروا على فرص عمل لأولادهم حتى ولو تطلب الأمر الرحيل من الصعيد للقاهرة عشان يدوروا على لقمة العيش.

بس الحقيقة إن دي مش الأزمة الأولى وممكن كمان ماتكونش الآخيرة للإعلامي تامر أمين، فهو عمل مشاكل وأزمات كتير انتشرت على السوشيال ميديا وبيبقى تريند كل فترة، من ضمن أزمات دي:

1- مشكلته مع صاحب قناة النهار "علاء الكحكي" ودخوله في محاضر وقضايا عشان مابياخدش مرتبه، لكن رجع تاني اشتغل في نفس القناة من نوفمبر 2018.

2- اتعرض للحكم بالحبس سنتين  وكفالة بـ 50 ألف جنيه مع إيقاف التنفيذ ، وغرامة 40 ألف جنيه، بسبب السب والقذف لعارضة الأزياء "مريهان هشام عبد القادر" أو "ميريهان كيلر" وانتهاك حرمة حياتها الخاصة.

3- الهجوم اللي شنه على الراقصات لما قال إن مفيش رقاصة محترمة، واتعرض بعدها لحملة عنيفة من الانتقادات وده لما كان بيحكي موقف له وهو سهران وقال "«صحيح أنى بسهر، وفى إحدى المرات كنت سهران في مكان كان فيه رقاصة، وفوجئت بسيدة محترمة بجانبى بتقول لى ما أنت بتسهر زينا أهو أُمال ليه عامل فيها شيخ، فكان ردى أنا عمرى ما قولت إنى شيخ وبأزعم أنى ماعملش حاجة غلط، ورأى في الرقص مالهوش علاقة بالسهر في الأماكن العامة، ومافيش حاجة اسمها رقاصة محترمة".

4- بعد اتهامه لكن الراقصات إن مفيش رقاصة محترمه، رفعت عليه فيفي عبده 4 قضايا وظهرت وهاجمته، ورد عليها بعد كده إن مفيش بينهم أي صداقة حالياً.

5- في لقاء له في برنامج "شيخ الحارة" مع إيناس الدغيدي اتهمته بالرجعية لكن أكد لها إنه رجل بصباص وقال لها "أنا رجعي وأفتخر ولكن بمفهوم غير مفهومك، أقصد المحافظة والتطور غير المضر، أنا على قديمه مع التحسينات اللى تناسبنا، وأنا مافيش عني تهمة إنى بصباص أنا شخص بحب الجمال في الطبيعة أو في الستات".

6- قرار نقابة الإعلاميين بوقفه عن العمل، وده بعد ما اتضح إن تامر أمين مش مقيد بجدول النقابة وماعندوش أي تصريح مؤقت بمزاولة النشاط الإعلامي، عشان كده قرر نقيب الإعلاميين منع تامر أمين من ممارسة النشاط الإعلامي لحد ما يتم تقنين أوضاعه بالنقابة، وتم إبلاغ النيابة العامة عن واقعة ممارسة تامر أمين للنشاط الإعلامي بالمخالفة لقواعد القيد المقررة وفقاً للنقابة.

7- وقف برنامجه بعد التهكم على المرأة، بعد الحلقة اللي ظهرت فيها معاه عضو مجلس إدارة النادي الأهلي وبطلة السباحة رانيا علواني، وواجه بعدها تامر أمين شكوى ضده في المجلس الأعلى للإعلام مقدمة من المجلس القومي للمرأة، وكان السبب إن أسلوبه بيفتقر آداب اللياقة، وأصول المهنية الإعلامية في حواره مع رانيا علواني وكان فيه سخرية منها عشان بتعمل مهام كتير في حياتها المهنية والإساءة لزوجها والسخرية من دعمه ومساندته القوية ليها وده بيعد إساءة لرجالة مصر اللي بيدعموا عمل المرأة.

Comments: