لو خايف من المستقبل.. إزاي تستمتع بالحاضر؟

21/02/2021

في سؤال لموقع healthline وهو موقع متخصص في المواضيع الطبية، كان بيقول السؤال: "أنا خايف من المستقبل ومتوتر من اللي بيحصل في العالم ومش عارف إيه اللي هيحصل في حياتي.. إزاي أقدر استمتع بالحاضر؟"

بترد الطبيبة النفسية جولي فراجا بإن مشاهدة الأخبار يوميا بيمثل خطر على الصحة النفسية وبيزيد مخاوفنا وممكن يتحول لقلق مستمر، خاصة لو تعرضت لصدمة في الماضي زي حادث أو مرض أو فقدان أحد أفراد الأسرة.

دكتور جولي بتنصح بالابتعاد عن الأخبار السلبية أو اللي بتعرض مشاكل العالم وتقليل الوقت اللي بنضيعه على السوشيال ميديا ولو لفترة مؤقتة على الأقل.

كمان بتنص بممارسة بعض الأنشطة زي اليوجا والتأمل أو التواصل مع شخص أو صديق مُقرب.

وبتنصح كمان بإعداد قائمة بأنشطة بسيطة زي إنك تخرج تتمشى أو تشوف فيلم كوميدي أو تقعد مع حد بتحبه وتشربوا قهوة أو تقرأ رواية.

ولازم تلتزم بإنك تعمل نشاط أو أتنين من دول في الأسبوع، ولازم تأخد بالك من حالتك النفسية أو مشاعرك خلال ممارسة الأنشطة دي.. يعني مستوى التوتر والقلق بيكون عامل إزاي في نشاط من دول؟ هل بتفصل من مشاكل العالم وأنت بتقرأ روايتك المفضلة؟ ولو ده تمام استمر.

ولكن لو بعد ممارسة الأنشطة دي ولسا حاسس بقلق وتوتر وكمان بدء يوصل لمرحلة التأثير على جودة نومك أو تناول الطعام أو شغلك، فا لازم تأخد خطوة إنك تكلم طبيب نفسي، لإن القلق العام هو من أكتر المشاكل النفسية المنتشرة ولكن مع مساعدة طبيب نفسي ممكن تتخلص منه بشكل كامل.

Comments: