اعرف شخصيتك عن طريق بتحب القهوة ولا الشاي أكتر

21/02/2021

هتشرب إيه شاي ولا قهوة؟ السؤال ده أكيد بيتسأل في كل البيوت لما يجيلهم ضيوف خصوصا لو هيشربوا حاجة سخنة وده لإن عموما الشاي والقهوة أكتر مشروبين أساسيين في أي بيت، وأي شخص عنده تفضيل لمشروب أكتر من الأتنين، وتفضيل الشخص لمشروب من الاتنين بيبقى قايم على شوية عوامل في شخصيته، موقع "Bright side" قال في مقال من مقالاته ليه الشخص ممكن يفضل القهوة على الشاي وشخص تاني ممكن يفضل العكس بناءاً على شخصيته:

1- الأشخاص الاجتماعية بتحب الشاي أكتر:

وفقا لاستطلاع رأي عملته "OnePoll"  في أمريكا، فكان الناس الاجتماعية واللي بيحاولوا يبقوا اجتماعيين بيحبوا الشاي أكتر، في حين إن الأشخاص الإنطوائية بيحبوا القهوة أكتر، وكمان كان فيه دراسة عاملها "أندرة سميث" من جامعة "كارديف" في بريطانيا بتقول إن الكافيين بيساعد الأشخاص الإجتماعية إنهم يشوفوا شغلهم، والأنطوائين بيشتغلوا أحسن في حالة قلة الكافيين.

2- محبين القهوة بيحبوا المجازفة:

فيه دراسة كشفت إن استهلاك القهوة بيبقى مرتبط بالإحساس والاندفاع والمخاطرة، غير كمان إن محبين القهوة بيستمتعوا بالأنشطة زي الرياضة العنيفة وبيحبوا التجارب الجديدة في أوقات كتير.

3- اللي بيشربوا شاي بيناموا أحسن:

الأشخاص اللي بيحبوا الشاي أظهرت نتايج الاستطلاع إنهم بيعتبروا نومهم متوسط، لكن محبين القهوة بيواجهوا مشاكل في النوم وبيعتبروا نفسهم أشخاص بتنام أقل.

4- محبين الشاي بيحبوا السكر:

أغلب محبين الشاي بيشربوا الشاي بسكر، لكن اللي بيحبوا القهوة بيستمتعوا بالقهوة سادة من غير أي سكر فيها.

5- محبين القهوة بيحبوا الكلاب:

لما سألوا اللي بيحبوا القهوة بيميلوا للكلاب ولا القطط كان اختيارهم هو الكلاب أكتر، لكن محبين الشاي كانوا بيحبوا القطط أكتر.

6- اللي بيشربوا الشاي مبدعين أكتر:

وفقا لموقع "sciencedirect" فالشاب بيساعد الناس تبقى مبدعة أكتر وبتخليهم سهل يوصلوا لأفكار جديدة، وفي الوقت نفسه فيه دراسة تانية على نفس الموقع إن بالرغم من عدم وجود تأثير للقهوة على الإبداع إلا إن القهوة بتخلي مهارات الشخص في حل المشاكل تبقى واضحة أكتر.

7- محبين القهوة مضغوطين أكتر بس أقل عرضه للاكتئاب:

فيه دراسة  اتعملت في جامعة "كنتاكي" قالت إن كل ما زادت واجبات الطلاب ومذاكرتهم زاد استهلاكهم  للقهوة، وبما إن الكافيين مادة محفزة فده مش صدفة، لكن على الجانب الآخر فيه جانب إيجابي تاني للقهوة، لقوا إن الأشخاص اللي بيشربوا قهوة بشكل متكرر كانت نسبة الاكتئاب عندهم أقل بنسبة 32% من اللي مابيشربوش قهوة.

Comments: