دس التراب خناقات بجد ولا ركوب للتريند.. القصة الكاملة لخناقات الراب في آخر يومين

22/02/2021

بقالنا كذا يوم بنفتح السوشيال ميديا على حوارات نص الناس مش فهماها أو خصوصا اللي مالهمش في الراب أو التراب مش فاهمينها اوي، وحتى لو فيه ناس بتسمع راب ممكن ماتبقاش فاهمة الموضوع أوي، لكن اللي مفهوم بالنسبة لهم إن فيه خناقة حاصلة بين مغنيين التراب الفترة دي.

بدأت الخناقة من كام يوم بنكش بين ويجز ومروان موسى في الستوريرز بتاعتهم على حساباتهم الرسمية على انستجرام وبدأت لما ويجز حط ستوري لشخص شبه مروان موسى من على اكونت تاني وهو بيغني تراك "ATM" لويجز، وكتب ويجز على الستوري دي "م م بنفسه" يعني مروان موسى بنفسه، وبعدها حط مروان موسى ستوري كتب فيها "بس يلا عشان ماكلملكش أمن بيفرلي"

وكان من الواضح كده إن النكش بينهم مانتهاش فكمل ويجز وحط ستوري عنده لأغنية أطفال من قناة طيور الجنة عن الفواكه والأغنية بتقول "الفواكه حلوة كتير، موز وخوخ، ومانجة، وتين" وده كان تلقيح على مروان موسى لإن مروان موسى بيقول في تراك شيراتون "معايا موزة معايا خوخة"

وبعدها كتب مروان موسى في ستوري عنده بتقول تراك "كله في السليم" كمان شوية، واللي كان بيدس فيه ويجز وأبيوسف وقال فيه "انتوا الاتنين مش نازلين لي من زوري، ايوه اللي جاي ده دوري، يا سطى أنت بتنكش في ستوري" وبعد دس تراك ويجز كتب مروان موسى في ستوري على انستجرام "أنت مش رابر ف ماتردش"

بعدها نزل ابيوسف ستوري عنده على انستجرام بيقول فيها "واحد قبل ما أنزل الألبوم بتاعي نزل دس عشان انشغل وارد عليه، ونزل الألبوم بتاعى، التاني بقى راح منزل دس عليه بعد الألبوم وولا عبرته، بس Guess what الألبوم نزل خلاص، فأنا هستحمى وهطلع ألبس وهتبقى خلصانة"، ونزل بعدها ستوري قال "أسمي الحقيقي مازن" ، بعدها رد مروان موسى في ستوري وقال "ستوري تاني؟" وعمل ايموجي بيضحك، ورد أبيوسف تاني في ستوري عنده وقال "لا مش ستوري هو فيه تراك أكيد هينزل بعلن عنه"، ورد عليه مروان موسى في ستوري بـ"ايموجيز" لحد مخضوض وخايف.

واتدخل بعدها في الموضوع "عفروتو" وكتب في ستوري عنده "البس حاجة طيب" وكان بيتكلم على أبيوسف، ونزل أبيوسف ستوري عنده بيقول فيها "تراك نازل بعد ربع ساعة بتمنالكو سهرة سعيدة".

لكن مروان موسى سبق ونزل تراك بيدس فيه أبيوسف الأول و"Cover" التراك صورة له هو وأبيوسف وأبو الأنوار وعامله لأبيوسف وأبو الأنوار منها "Crop" وطالع في الصورة هو لوحده، التراك اسمه "مش اوكيه" وبعد دس أبيوسف جاب سيرة ويجز في التراك وقال "ده حتى وجوزة الطفل طلع أعقل منك" وقال جملة تانية لويجز "وأحب أقول لوجوزة لو رديت هفلقك".

بعدها نزل عفرتو ستوري عنده على انستجرام وكتب فيها "قولتلك هتتغفل فكرتني بنط في الحكاية، وأنا وقتها كنت بنصحك، غبي" والستوري اللي بعدها كانت صورة لمروان موسى وكتب عليها "الواد كتب التراك قدامي في نصايه وأنت الربع ساعة بتاعتك بقالها ساعة"، ورد مروان موسي في ستوري بيسأل فيها أبيوسف "أنام يعني؟" وده لإن تراك أبيوسف اتأخر فعلا.

بعدها نزل أبيوسف التراك اللي قال عليه اللي كان اسمه "ميجاترون"، واللي علق عليه ناس كتير وقالوا إنه تراك ضعيف، وبعدها قال مروان موسى في ستوري "يارتني نمت".

واتدخل عفروتو في الموضوع بشكل كبير بعد كده وعمل تراك بيدس فيه أبيوسف اسمه "جو صعب" واتكلم فيه عن تفاصيل كتير في حياة أبيوسف، وعشان كده ظهر بعدها الجوكر في الستوريز عنده على انستجرام وقال "يمكن الواحد وهو بيكتب دس ساعات مابيعرفش يمسك نفسه قدام بار صايع عيب يتقال، أو داتا معاه على رابر مش أصول يستخدمها.. العادي يعني إن الإنسان ضعيف.. بس الإنسان الكويس بيراجع نفسه" وكمل وقال "وأنا افتكر إن زمان كان ليا بارين أعتذر للشخص اللي كتبتهم عليه، ولحد النهاردة مفيش مخلوق يعرف دول على مين لإني ماكنش يصح أقول كده، ولما نزلت دس "فقرة الفقرة" اللي نزلت عليه الدس كلمني بعدها بيوم وقالي إن الداتا اللي استخدمتها عليه سببتله مشاكل حقيقية اعتذرت له، ومسحت التراك وهو معايا على التليفون"، وقال "أتمني إن عفرتو يراجع نفسه لإني واثق إنه إنسان محترم"، وعمل منشن لابيوسف وقاله "وأنت جامد يلا بس مفرهد شوية، وأنا هفوقلك".

وحصل حاجة كانت غريبة شوية في وسط الأحداث دي إن الشركة اللي كانت منظمة لحفلة أبيوسف وعفرتو في شهر 12 اللي فات طلعت بيان وضحت فيه السبب اللي خلى أبيوسف مايطلعش على المسرح يومها، وقالت إنه خد كل فلوسه رغم إنه ماطلعش، وإن عفروتو ماخدش فلوسه كاملة بس احترم جمهوره.

بعدها وصل الرد الرسمي من أبيوسف في تراك اسمه "سيت" بيدس فيه مروان موسى وعفرتو، ولو هنلاحظ حاجة فهنلاحظ إن ويجز اختفى من الموضوع خالص، ولكن اللي ظهر بعدها في الخناقات دي كان الانفلونسر خالد مختار وده لإن في تراك "سيت" اللي بيدس بيه أبيوسف مروان موسى وعفرتو اتكلم على خالد مختار وقال "المهم... ااه نسيت كنت بلطش في الهلافت ماتكلمنيش يا كوميديان خليكي في برتقانك دي لمت.. و ده مش راب بالنسبالي ده حلو ليكو بس لا مش تراك بالنسبالي، عامل رابر ع الوينجز... لا مش مان بالنسبالي مهووس بيا صاحبي انت فان بالنسبالي".

 ومن هنا ظهر خالد مختار في الخناقات وعمل فيديو في الستوريز بتاعه على انستجرام بيكلم فيها أبيوسف وبيقوله "لما تقول لحد ماتجيبش سيرتي عشان ماهزقكش فيجيب سيرتك فمعنى كده إنه حد مهزء، فهو بيحب كده، فلو ده "الفيتش" بتاعك يا بني أنا ممكن أقعد أقل منك كل ما ابقى فاضي، أنا ممكن اهينك كل ما ابقى فاضي، فيا عم أنا راجل بتاع فيلترز، وخليني في برتقاني وأنت أصلا دماغك شبه فلتر الدومة، فممكن مانسمكش أبيوسف خالص ونسميك أبو دومة" وبعدها حط صورة أبيوسف وجنبها دومة.

فرد أبيوسف بعد كده وقاله إنه ماجبش سيرته عمري، وهو اللي بدأ ووجهله كلام، والحوار ده مش جديد في الراب، وإن دماغه زي الدومة الحمد لله، ثانيا إن الناس بهدلت خالد مختار عشان اتريق على أبيوسف عشان كده هو بيستعطف فانز الراب، وقاله في الآخر يتفرج على سيف زهران واسلام حسام، وبلاش الميك أب والطرحة مع فانز الراب عشان مش هيعرف يسيطر عليهم.

بعدها نزل مروان موسى تراك دس في أبيوسف تاني اسمه "ميجاترول" ورد عليه أبيوسف تاني اسمه "إعصار كاترينا" وأبو الأنوار عمله كومينت على التراك وكتب له "أخويا الكبير اللي مشرفني وعامل منهم صنادل" 

وفي آخر حدث حصل إن تميم يونس عمل فيديو في الستوريز عنده وبارك لأبيوسف على الألبوم الجديد وقال لخالد مختار شكرا إنه قال عليه مخرج بس دي حقيقة، وقالهم صلوا على النبي يا جماعة، خلي اللي يجيب في سيرتك براحته أنت راجل كوميديان دي حاجة ماتزعلش وأبيوسف راجل من مؤسسين الراب سين، وكل الناس تشهد له بكده، ولازم نفصل بين الفن والعلاقات الشخصية ومافيش داعي لوجع الدماغ ده كله لإنه مشغول جدا، وقال في الآخر إنه مبسوط باللي بيحصل في "الراب سين" و"التراب سين" والطفرة اللي بتحصل، وطلب منهم مابيوظهاش.

Comments: