كل اللي محتاج تعرفه عن تسجيل ملكية الوحدات السكنية بالشهر العقاري و"العقد الأخضر"

23/02/2021

بداية من يوم 6 مارس 2021  هيتم تطبيق تعديلات قانون الشهر العقاري الجديد، اللي بتشترط عشان يتم نقل الملكية وإدخال المرافق لأي وحدة سكنية أو عشان يتم تعامل الوحدات السكنية مع المصالح الحكومية، وده معناه إن بداية من 6 مارس عشان يتم الاعتراف بالوحدات السكنية لازم يكون فيه "العقد الأخضر".

لكن إيه هي مميزات العقد الأخضر اللي ممكن ينتفع بيها الشخص لما يحول عقد وحدته السكنية لعقد أحضر:

1- يعتبر أعلى سند من سندات الملكية الخاصة بالوحدات العقارية

2- العقد الأخضر بيكون فيه رقم وتاريخ شهر ومختوم بختم "زهرة اللوتس" الخاص بمكتب الشهر العقاري

3- يعتبر عقد توثيق نهائي ومُلزِم خاص بالوحدة السكنية.

4- قانونا مافيش حد يقدر ينازع الشخص صاحب العقد الأخضر على ملكية الوحدة السكنية خصوصا إنه بتم تسجيله بالشهر العقاري

5- بيترتب على تسجل الوحدة بالعقد الأخضر ارتفاع في ثمن الوحدة السكنية خصوصا إن مفيش نزاع عليها في ملكيتها وتأكيد إن مافيش عليها أي مخالفات عن طريق العقد ده.

6- من خلال العقد الأخضر ده يقدر الشخص بنقل المرافق وتوصيلها زي المياه والغاز والكهرباء ونقل الملكية.

7- الوحدات السكنية اللي مسجلة بالعقد الأخضر بتخضع لامتيازات التمويل العقاري.

لكن قال المستشار عمر مروان وزير العدل إن المواطنين مش مجبرين على تسجيل وحداتهم السكنية في الشهر العقاري بعد إقرار تعديلات قانون الشهر العقاري الجديدة وإضافة المادة 35.

وقال في مداخلة في برنامج "على مسئوليتي" اللي بيتم عرضه في قناة صدى البلد، إن المواطنين غير مُلزمين بتوثيق عقود ملكيتهم للعقارات المملوكة لهم في الشهر العقاري إلا لو تعامل مالك العقار مع الجهات الحكومية لو كان عايز يوصل الخدمات والمرافق زي عدادات المياه والغاز والكهرباء وغيرها.

وقال إن رسوم للتوثيق بالشهر العقاري بتبدأ من 500 جنيه لـ 2000 جنيه، وهي أقصى قيمة للمساحات التي تزيد على 300 متر، ده غير سداد 2.5% من قيمة الوحدة والمندرجة تحت اسم "ضريبة التصرفات العقارية"، ودي اللي تم إقرارها من فترة طويلة.

وقال إن نقل الملكية العقارية مستقبلًا مش هيتم غير عن الطرق القانونية وتوثيق الملكية الجديدة بالشهر العقاري.

وكانت وزارة العدل يوم الأتنين 22 فبراير 2021 نفت كل الإشاعات اللي انتشرت عن  إلغاء دعوى صحة التوقيع وقالت إن دعوى صحة التوقيع هي عبارة بس عن دعوى تحفظية الغرض منها إن الشخص يحصل على حكم يضمن له إن خصمه مش هيقدر ينازعه في صحة توقيعه.

Comments: