٦ فوائد لممارسة الكيك بوكسينج: هتحبها بعد ما تقرأ عنهم

01/03/2021

كتب: محمود عادل

من زمان وإحنا بنسمع عن الفوائد اللي ملهاش آخر عن ممارسة الرياضة، في أي شكل ليها هتكون مفيدة سواء بتروح الجيم أو بتنزل تمشي وتجري أو بتلعب لعبة معينة زي كرة القدم، طيب لعبة زي الكيك بوكسينج أو زي ما إحنا بنسميها ألعاب الدفاع عن النفس هل لها فائدة غير إني بعرف ادافع عن نفسي؟

الحقيقة أه، الكيك بوكسينج هي شكل من أشكال فنون الدفاع عن النفس وبتنقسم لطريقتين، طريقة أمريكية واسمها كيك بوكسينج بتستخدم فيها اليد والقدم، والملاكمة التايلاندية أو الـ "مواي تاي" بتستخدم فيها الكوع والركبة.

والكيك بوكسينج له كذا فائدة سواء لصحة القلب أو للوزن وكمان للصحة النفسية، هنستعرضهم مع بعض بشكل مفصل:

صحة القلب والأوعية الدموية: دراسة من المكتبة الوطنية الأمريكية للطب اتعملت في 2014 بتقول ممارسة الكيك بوكسينج ثلاث أيام في الأسبوع ولمدة ساعة بتزود من امتصاص الأكسجين في جسمك.. بمعنى إيه؟ حسب موقع healthline إن بيحصل زيادة في كمية الأكسجين اللي تقتدر  تستخدمها خلال النشاط البدني وده بيكون مؤشر على قدرة القلب والأوعية الدموعية على التحمل وكل ما زادت كل ما قدرت تاخد أكسجين أكتر في جسمك وتستخدمه، الموضوع ببساطة عامل زي واحد بيجري بقاله سنين فا نفسه مش بيتقطع بسهولة مقارنة بواحد بدء يجري من يومين فا مش بيقدر يستحمل وبيضطر يوقف جري عشان يهدى وياخد أكسجين.

قوة العضلات

وفي نفس الدراسة، المشاركين فيها لاحظوا تحسن في قوة العضلات في الجزء العلوي والسفلي من الجسم.

فقدان الوزن

الكيك بوكسينج طول الوقت في فرهدة يعني أنت بتبدء تمرينك بشوية كارديو وتسخين وبعدين تخش في التمرين وفي الغالب مش بيكون في راحة طويلة، فا الأبحاث حسب موقع healthline أظهرت أن لاعبين الكيك بوكسينج المحترفين والهواة عندهم كتلة عضلية أكبر ونسب دهون أقل في الجيم، وممكن الشخص اللي وزنه 70 كيلو يحرق 372 سعرة حرارية خلال نص ساعة فقط.

الثقة في النفس

فنون الدفاع عن النفس واللي الكيك بوكسينج منها بتحسن الثقة في النفس واحترام الذات، زي الشخص اللي بيروح الجيم اللي لما بيبدأ يطلعله عضل ثقته بنفسه بتزيد ومش بيكون شخص مهزوز وبالتالي يقدر يتصدى لأي تهديد أو خطر ويدافع عن نفسه.

نوم أفضل

لو عندك مشاكل في النوم فا أعتقد لعبة زي الكيك بوكسينج هتساعدك على نوم أفضل سواء من ناحية جودته أو مدته، لأن حسب موقع healthline إن الحرمان من النوم بيزيد الاصابة بالسرطان وأمراض القلب وفي المقابل لو نمت بشكل مريح وخدت كفايتك، ده بيحسن المزاج والقدرة على التفكير وبيزيد من مستوى طاقتك.

الصحة العقلية

ممارسة الكيك بوكسينج بيساعد على تحسن الصحة العقلية والحالة المزاجية، وده عن طريق زيادة هرمون الإندروفين* وده بيساعدك على تقليل التوتر والقلق والاكتئاب.

*هرمون الإندروفين حسب موقع ويب طب ده مادة كيمائية بتساعدك على تسكين الألم وتخفيف التوتر وبيجي من كذا طريقة زي الضحك الجامد أو الرياضة أو الأكلات الشهية الجميلة أو ممارسة الجنس.

طيب إمتى تقدر تمارس رياضة الكيك بوكسينج؟ بص هي رياضة زي أي رياضة وكمان بتستخدم فيها جسمك كله تقريبا فا حط في دماغك إن ممكن تحصل اصابات ممكن في الكتف أو الظهر أو الورك أو الركب أو الكعب، فا لو عندك إصابات في المناطق أو في مشاكل في القلب والرئة دي فا يفضل استشارة طبيب قبل ما تبدأ في الرياضة دي.

وأهم نصائح قبل ما تبدأ في الكيك بوكسينج:

1- خليك على الهادي وأنت بتلعب ومتنساش تسخن قبل كل تمرينة عشان تقلل خطر الإصابة.

2- حط في دماغك أنت رايح ليه؟ هدفك إيه من التمرين؟ يعني هتخس أو عايز ترفع لياقتك البدنية.. لإن لو اتوجد الهدف هيكون في استمرارية.

3- كُل كويس قبل التمرين واشرب مياه طول الوقت.

الكيك بوكسينج رياضة زي أي رياضة، بس لو التزمت فيها بيكون لها عائد عظيم سواء ماديا في خسارة الوزن وزيادة لياقتك البدنية أو معنوي زي تحسن الصحة النفسية وزيادة الثقة في النفس.

Comments: