مؤسسة مجدي يعقوب أعلنت إنشاء مركز القلب الجديد بالقاهرة بالتعاون مع شركة "أوراسكوم"

02/03/2021

أعلن مجلس أمناء مؤسسة مجدي يعقوب لأمراض وأبحاث القلب في بيان صحفي إن المؤسسة تعاقدت مع شركة أوراسكوم للإنشاءات عشان يتم إنشاء فرع جديد من مركز مجدي يعقوب العالمي في القاهرة، وده في إطار حرص المؤسسة على سرعة إنشاء المركز الجديد عشان عدد المستفيدين من الخدمات الطبية اللي بيقدمها المركز لمرضى القلب والأوعية الدموية مجاناً يزيد.

 مركز مجدي يعقوب العالمي الجديد هيكون في مدينة 6 أكتوبر على أرض مساحتها 36.5 فدان ومساحة البناء هتبقى 27 فدان وهيقدم خدمات طبية مجانية للمرضى من داخل مصر وخارجها وطاقته الاستيعابية هتوصل لـ 120 ألف مريض و12 ألف عملية جراحية في السنة.

والمركز كمان هيضم 300 سرير و5 أوض عمليات و 5 معامل قسطرة للقلب بما فيهم أوضة متعددة الخدمات ومركز تصوير رنين مغناطيسي ومعامل بحث وابتكار على مستوى عالمي وهيبقى مساحتها 5000 متر، ده غير منشأة تعليمية وتدريبية ومساحتها هتكون 4000 متر، ده غير قسم الطوارئ.

وقال دكتور مجدي يعقوب إن قرار التعاقد مع شركة أوراسكوم للإنشاءات لإنشاء مركز مجدي يعقوب العالمي للقلب بالقاهرة بيمثل علامة فارقة في طريق طويل لضمان التميز في المركز الجديد على كل المستويات، وقال إن حلم إنشاء أكبر مركز عالمي للقلب والأوعية الدموية في الشرق الأوسط بيجسد روح مركز القلب بأسوان بقى حقيقة واقعة.

وكمل وقال "النجاح ده نتيجة مباشرة لجهود فريق كبير مؤمن برسالة المؤسسة، وبدعم غير مسبوق من المجتمع المحلي والمجتمع الدولي لمساندة المؤسسة عشان تؤدي دورها" وقال كمان "ويشرفني إني أكون جزءًا من الفريق العظيم ده".

وصرح الدكتور مجدى إسحاق نائب رئيس مجلس الأمناء لمؤسسة مجدي يعقوب وقال "يسعدنا بمؤسسة مجدي يعقوب للقلب شراكتنا مع شركة أوراسكوم للإنشاءات لإنشاء مركز القلب الجديد بالقاهرة، واللي صممته شركة من أكبر شركات الاستشارات الهندسية وهما فوستر وشركاه ودار الهندسة، وإن المؤسسة قامت بإنشاء المركز الجديد عشان مستقبل صحة الشعب المصري وخاصة أطفالنا"

وأضاف "مركز مجدي يعقوب العالمي للقلب بالقاهرة هيبقى علامة بارزة في تقديم خدمات رعاية صحية مميزة لأمراض القلب مجانًا، وكمان هيضم مركز للتدريب والتدريب المهني للأجيال اللي بعد كده من مصر وخارج مصر وهيكون منارة للبحث والابتكار.

الرئيس التنفيذي لشركة أوراسكوم للإنشاءات "المهندس أسامة بشاي" صرح برضه وقال "إحنا فخورين باختيارنا للشراكة مع مؤسسة مجدي يعقوب للقلب عشان نبني مجمع حديث من ضمن تخصصاته إنه يوفر رعاية صحية عالمية وإنه هيحول مصر لمركز رائد لأبحاث القلب والتدريب وإنهم فخورين في شركة أوراسكوم للإنشاءات إنهم بنفسهم اللي هينفذوا المشاريع اللي هتسبب تحسين ملموس في المجتمع، وإن المشروع ده بيجسد الروح دي، وده شرف كبير لينا إننا لعب دور أساسي في إحياء رؤية الدكتور مجدي يعقوب".

Comments: