إزاي "متلازمة توريت" بتخلي المصابين بيها حياتهم صعبة؟

03/03/2021

تخيل تكون بتعمل حركات بشكل لا إرادي أو بتقول كلام مش عايز تقوله وفي نفس الوقت بتحاول تسيطر على الموضوع اللي مسببلك إحراج طول الوقت وأحيانا ممكن تتفهم غلط بسبب حركة لا إرادية خرجت منك! للأسف ده اللي بيعيشه أصحاب متلازمة "توريت".

تعريفها:
هي إضطراب عصبي بيسبب حركات جسدية متكررة ولا إرادية ومش قادر صاحبها يسيطر عليها، زي الرمش أو رفع الكتاف أو اخرج أصوات غريبة زي الطرقعة من البوق أو ألفاظ مسيئة

إيه هي أعراضها؟
الأعراض ممكن تختلف من شخص للتاني وبتظهر عادة ما بين سن 3 سنين لـ9 سنين بتبدأ تشنجات لا إرادية في الرأس والرقبة والأطراف وبتتفاقم الأعراض بشكل أكبر في سنوات المراهقة و أوقات الضغط العصبي والقلق 

طب إيه سببها؟
متلازمة توريت معقدة جدا، ممكن يكون بسبب تشوهات في بعض أجزاء الدماغ أو في جزء من معين من الدماغ والمسؤول عن التحكم في الحركات، وممكن يكون عيب جيني أو سبب وراثي ولكن السبب الرئيسي حاليا غير معروف.

معلومة جانبية بس مهمة: الأشخاص المصابين بالمتلازمة أحيانا بيعانوا من حاجات تانية زي اضطراب فرط الحركة ونقص الانتباه ووسواس قهري وصعوبة في التعلم واضطرابات في النوم والقلق والمزاج.

طيب إزاي بيتم علاج متلازمة توريت؟
حسب موقع healthline لو التشنجات اللاإرادية مش شديدة فا غالبا مش بتحتاج علاج ولكن لو كانت شديدة وبتوصل المريض للتفكير في إيذاء نفسه فا بيكون في علاج نفسي وعلاج سلوكي.

هل الدعم مهم للمصابين بالمتلازمة؟
أيوة، الأشخاص المتعايشين معاها بيحسوا بالوحدة والانعزال ومش بيكونوا قادرين على المشاركة في أي أنشطة جماعية مع ناس تانية لإنهم مش بيكونوا قادرين على التحكم في التشنجات اللاإرادية اللي بتجيلهم.

هتلاقوا في الفيديو ده، المغنية الأمريكية بيلي ايليش وهي بتتكلم عن مرضها بالمتلازمة.

وفيديو تاني لمريضة بالمتلازمة عشان تعرفوا أكتر عنه.

Comments: