١٠ حاجات هتساعدك تتخطى الكراش وتنساه

08/03/2021

كتب: محمود عادل

لازم تفهم في البداية إن مفيش مشكلة لو بتكراش على حد أو روحت لشخص ما وقولتله إنك بتحبه وهو مبدلكش نفس الشعور، الموضوع كله عدم توافق ولا بيقلل منك ولا منه، وممكن بعد فترة تحمد ربنا على إن محصلش توافق، والمشاعر هتختفي مع الوقت.. هتقولي إزاي؟ هقولك زي السكر في الشاي، ولكن في ناس بيكون عندها مشاكل في تخطي الموضوع، ولذلك في 10 حاجات هيساعدوك على إنك تطلع من عنق الزجاجة حسب موقع healthline.

تقبل مشاعرك
أول غلطة بيقع فيها الشخص هو إنه ينكر إن في أي مشاعر تجاه الشخص اللي بيكراش عليه ويقول لا مفيش الكلام ده والدنيا تمام، لا المفروض تعترف بداه خصوصا لو كان حد من الأصدقاء، لأنك لما بتقر بمشاعرك دي وبتتقبلها بتبقى دي أول خطوات في إنك تقدر تتخطى الشخص ده، ولو حاولت تضغط على نفسك أو بمعنى أصح تضحك على نفسك إن مفيش حاجة ومفيش أي مشاعر بدل ما تتعامل معاها بشكل شجاع ده مش هيساعدك.

إدي لنفسك وقت
لو فاكر إنك هتفضل متضايق وحاسس بخنقة وضيقة زي الفنان أحمد سعد فا أحب أقولك إن ده مش صح، لإن مشاعر الحب تجاه الناس دي ممكن يقل في شهور قليلة أو أسابيع كمان، ممكن أكتر أو أقل ولكن خلال الفترة دي ممكن تشوف حاجات تلهي نفسك فيها عن الناس دي زي أنشطة رياضية، أو تتكلم مع نفسك بالكلام الإيجابي الداعم والمحفز، أو تروح تلعب يوجا أو تسافر تقعد في الطبيعة وتراقب أسراب القريدس.

بص للناس من زاوية تانية
عادة لما الشخص بيكراش على حد بيكون زي الفنان عمرو دياب لما قال "أيوة مفيش منك تخيل" وإنه شخص مثالي جدا ليك، بس شوف كدة أكيد في اختلافات أو حاجات مش بتحبها في الشخص ده، الطبيب النفسي كيم إيجل بيقول: "لما تبقى صريح مع نفسك ده هيساعدك" وإنك تبص للموضوع بصدق أمر ضروري عشان يخليك تكمل وتتخطى والسؤال الأهم هو: "هل هتتوافقوا مع بعض في علاقة طويلة الأمد.. زي جواز مثلا؟"

اتكلم مع حد

لو الشخص مش عارف يتعامل مع مشاعره، فا هو محتاج يشوف حد من الناس القريبة منه واللي بيثق فيهم أو حتى شخص يعرف الشخص اللي هو بيكراش عليهم، ده ممكن يساعدهم ويخليهم يبصوا للموضوع من زاوية أوسع.

لو في علاقة بس بتكراش على حد تاني تعمل إيه؟
الجزء ده ممكن يبان شوية غريب بس محتاجين نتكلم فيه، حتى الناس اللي في علاقة ممكن يكونوا حاسين بمشاعر ناحية شخص تاني وبيكراشوا عليه بس ده مش معنى إنهم ينفصلوا، لا بالعكس، فا الشخص ده محتاج يتكلم مع الشخص اللي معاه ويشرحله الموضوع وممكن يساعدك إنك تتخطى وتفهمه إنك مش هتأخد أي فعل في الموضوع وإنك بتحاول تتخلص منه، لإن الثقة بتيجي من الصدق وده بيقوي العلاقة.

بلوك ع الإنستجرام بلوك ع الواتساب.. بلوك بلوك بلوك
هو مش شرط أوي تعملهم بلوك لو مش عايز، ممكن تعمل أنفولو مثلا وتتجنب إنك تخش تبص على كل بوست عشان السيرش اشتكى منك، وإنك تعمل بوست لحاجات تلفت نظرهم "التلقيح يعني" طيب بنعمل كدة؟ عشان رؤيتنا لصورهم على السوشيال ميديا بيخلي مشاعر الحزن تتفاقم أكتر وأكتر ولما تيجي تنام تسأل نفسك "هو أنا ليه مش معاها، أو تسألي نفسك أنا ليه مش معاه".

هنصيغ المشاعر من أول وجديد
يعني لو أنت بتقضي وقت مع شخص، والشخص ده دمه خفيف وبيضحكك وفي جوانب حلوة كتير في شخصيته مش لازم عشان يفضل موجود في حياتك إنك تكراش عليهم أو ترتبط بيهم! هو أحيانا ده بيحصل بشكل تلقائي والمشاعر الإيجابية ناحية الشخص ده بتتطور، في النهاية اللي عايز أقوله إن ممكن في اتنين علاقتهم قوية جدا ومع بعض طول الوقت بس من غير علاقة عاطفية، لإن العلاقة العاطفية مش ده ليفل الوحش في العلاقات.

الصداقة مش حاجة وحشة
ممكن الصداقة تكون علاقة أفضل بكتير من العلاقة الرومانسية وبتخليك على تواصل مع شخص أنت بتحبه ومهتم بيه، بس ده بعد ما تكون خلاص الموضوع انتهى وأنت تخلصت من كل مشاعر الحب اللي جواك.
ومتحطش أمل على إن ممكن الصداقة توصلك لحاجة أعلى، عشان في الآخر في احتمالية لإرتداء خازوق، فا يعني بص لنص الكوباية المليان وإن أنت معاك شخص مش عايز يتخلى عنك حتى لو مش بيبدلك نفس مشاعر الحب وإنه بيحبك ومهتم بأمرك وعايز تكون جنبه وإن علاقة الصداقة دي ممكن تكون أحسن بكتير من العلاقة الرومانسية.

قوم اخرج وشوف الدنيا
المفتاح الأول اللي بيلجأ له أي شخص مجروح عاطفيا هو إنه يلهي نفسه، قوم جرب أي حاجة جديدة معملتهاش قبل كدة ومش هتفكرك بالكراش، تشترك في جمعية خيرية، هلال أحمر هلال أزرق.. أي حاجة هتلهيك هتكون كويسة ويا سلام لو تعرف شخص بيمر بالحالة دي وساعدته هتبقى عملت فيه جميلة.

كلم دكتور لو سمحت
لو حاسس أو شايف إنها خلاص اسودت جامد في وشك، زي إن في أفكار سلبية عندك أو حاسس بحزن مستمر ووحدة أو بتقلق جامد لو مشوفتش الكراش بتاعك فحاول تكلم دكتور وتتلقى مساعدة من شخص محترف

Comments: