ليه في ناس عينيها لون ولون؟

14/03/2021

عمرك شفت قبل كده قط عينه لون ولون، أو شفت شخص وقعدت تفكر هو ده بيحصل ليه أو إيه ده اصلًا.. خلينا نشرحلك بقى الموضوع من اوله
الحالة دي اسمها تغاير تلون القزحيتين (Heterochromia)

وبيكون له أكتر من نوع
1-تغاير تلون القزحيتين الكامل (Complete heterochromia)، وده بيكون الاختلاف اللون بين العينين تام، يعني عين لونها أزرق والتانية أخضر.

2-تغاير تلون القزحيتين الجزئي (Partial heterochromia)، وهنا بيكون جزء من القزحية لونه مختلف عن لون باقي القزحية.

3-تغاير تلون القزحيتين المركزي (Central heterochromia)، في الحالة دي بيكون لون الحلقة الداخلية من القزحية مختلف عن لون الحلقة الخارجية من القزحية.
 

والحالة دي بتكون شائعة بين الحيوانات أكتر من البشر، ودول شوية من أسبابها


متلازمة هورنر (Horner’s syndrome)، وهي حالة طبية نادرة الحدوث، سببها خلل في أعصاب الوجه، وتشمل أعراضها تغير في لون القزحيتين


و"متلازمة واردنبرج" (Waardenburg syndrome)، وبتضم المتلازمة دي مجموعة من الحالات والتغيرات الجينية التي قد تتسبب في العديد من المشاكل الصحية مثل فقدان حاسة السمع وتغيرات في الشعر والبشرة ولون العيون.

متلازمة ستيرج ويبر (Sturge-Weber syndrome)، ومن الأعراض المميزة لهذه الحالة هي ظهور وحمة لونها بنفسجي  على الوجه منذ الولادة، وبيكون سببها عادة مشاكل في بعض الأوعية الدموية، كما تعتبر النوبات والتشنجات من الأعراض الشاعة لهذه المتلازمة كذلك، وأحياناً قد ينشأ اختلاف في لون العينين.

متلازمة بري رمبيرج (Parry-Romberg syndrome)،  وهي متلازمة بتعتبر نادرة الحدوث، ويظهر فيها جانب من الوجه بجلد مجعد  والجنب التاني طبيعي.

وفي بعض الحالات بتكون دي طفرة جينية ومش بيعاني الشخص من أي مشاكل صحية، والموضوع مش بيأثر على قوة النظر أو أي حاجة بالعين، وبيتم إخفاء ده على حسب رغبة الشخص عن طريق العدسات اللاصقة، أو بعض الناس بيفضلوا يسيبوها لأنها علامة على الجمال والاختلاف!

Comments: