احنا بنام ليه وهيحصل إيه لو بطلنا ننام؟

15/03/2021

النوم هو أهم لحظة في حياة ناس كتير، بيكون النهاية ليوم طويل ممل أو شاق ومتعب وفي ناس بتحب النوم لمجرد النوم وخلاص.. وفي كام سؤال كدة مهمين عن النوم، أولهم بيحصل إيه وإحنا نايمين؟

في أهم 3 حاجات حسب موقع Healithline:

- الدماع بيخزن معلومات جديدة 
- الخلايا العصبية بتتواصل وبيعاد تنظيمها وده بيساعد إن الدماغ تكون أفضل 
- الجسم بيستعيد طاقته وبيصلح الخلايا وبيفرز هرمونات 

وكل ده مهم ولو محصلش جسمنا مش هيشتغل صح.

طيب ليه بنام؟
للأسف محدش عارف إحنا بنام ليه! أو مفيش سبب واحد بيفسر حاجتنا القوية للنوم ولكن هو ضروري لعدة أسباب بيولوجية، والعلماء شايفين إن النوم بيساعد الجسم في كذا حاجة وإن العلماء بردو ليهم نظريات في الموضوع ده، هنختصرهم وناخد الخلاصة منهم:

الطاقة:
الإنسان بيحتاج النوم عشان يحافظ على طاقته، بمعنى إننا خلال النوم بنقلل احتياجاتنا من السعرات الحرارية، والأبحاث بتقول إن 8 ساعات نوم بتوفر طاقة يومية بنسبة 35%.

الخلايا:
النوم بيخلي الخلايا تتعافى وترجع تنمو تاني، يعني بتصلح العضلات، بتخلي الأنسجة تنمو، بتفرز هرمونات مختلفة.

الدماغ:
النوم بيقوم بإعادة تنظيم للخلايا العصبية، يعني لما بنام، بيتم التخلص من "فضلات أو مخلفات" من الجهاز العصبي اللي بتتراكم على مدار اليوم وده بيخلي الدماغ تشتغل بشكل أفضل لما نصحى من النوم.
والأبحاث بتقول إن النوم بيساعد الذاكرة على تحويل الذكريات قصيرة المدى لذكريات طويلة المدى، وده بيتم عن طريق محو أو نسيان المعلومات الغير مهمة واللي ممكن إنها تسبب زي فوضى في الجهاز العصبي، وفي النهاية لو بتنام كويس ده هيأثر بشكل إيجابي على كذا حاجة زي: التعلم، الإبداع، مهارات حل المشاكل والأزمات، صناعة القرار، التركيز، وده مهم في كل جوانب حياتنا سواء على المستوى الشخصي أو العملي أو التعليمي.

الوزن:
النوم بيأثر على وزننا لإنه بيتحكم في هرمونات الاحساس بالجوع، هرمون الجريلين ده اللي بيزيد الشهية، واللبتين ده الشعور اللي بنحسه بعد الأكل "الشبع يعني".

فا خلال النوم، الجريلين بينخفض لإنك بتستخدم طاقة أقل من اللي بتستخدمها وأنت صاحي، ولذلك لما بتنام أقل، الجريلين بيرتفع وهرمون اللبتين بيفضل ثابت على وضعه، وده خلل مش حاجة طبيعية، فا بتحس إنك جعان فتأكل أكتر فتتخن أكتر وأكتر.

ولذلك لو منمتش لعدة أيام ده بيعرضك لمخاطر كتير زي البدانة أو مرض السكر من النوع التاني أو متلازمة الأيض "متلازمة التمثيل الغذائي" ودي بتودينا لحاجات أخطر وأكبر.

المناعة:
الأبحاث بتقول إن الحرمان من النوم ممكن يعيق عمل المناعة بشكل جيد وده بيخلي الجسم أكثر عرضة لخطر الجراثيم أو الفيروسات.

لما بنام، الجسم بيصنع حاجة اسمها "سيتوكينات" ودي بروتينات بتخلي الجسم يكون قادر على مقاومة العدوى وبتمنع إصابة الانسان بالأمراض وتدمير الجراثيم الضارة.

ولذلك لما بنكون تعبانين وأهلك يقولولك نام وإصحى هتبقي كويس فا غالبا كلامهم ممكن يكون فيه شيء من الصح.

صحة القلب:
العلماء بيتعقدوا إن النوم بيدعم صحة القلب وإن في ارتباط بين أمراض القلب وقلة النوم.

مركز السيطرة على الأمراض والوقاية منها "CDC" بيقول إن الشخص البالغ بيحتاج 7 ساعات نوم ولو نام أقل من كدة ده ممكن يعرضه لمشاكل صحية ويضر بصحة قلبه.

ومش بس كدة، قلة النوم مرتبطة بعوامل أخطر زي ارتفاع ضغط الدم، زيادة الوزن، مقاومة الإنسولين، ارتفاع مستوى الكورتيزول

طيب كل واحد فينا باختلاف أعمارنا، بنحتاج ننام قد إيه؟!

الطفل اللي عمره 3 شهور: من 14 لـ17 ساعة
من 4 شهور لـ 12 شهر: من 12 لـ 16 ساعة خلال 24 ساعة
من سنة لـسنتين: من 11 لـ 14 ساعة 
من 3 لـ 5 سنوات: من 10 ساعات لـ 13 ساعة 
من 6 سنوات لـ 12 سنة: من 9 ساعات لـ 12 ساعة
من 13 سنة لـ 18 سنة: من 8 لـ 10 ساعات
من 18 سنة لـ 60 سنة: من 7 ساعات أو أكتر
من 61 لـ 64 سنة: من 7 ساعات لـ 9 ساعات
من 65 سنة أول أكتر: من 7 ساعات لـ 8 ساعات.

أخر سؤال وأهم واحد، هيحصلنا إيه لو منمناش كويس؟

الجسم مش هيشتغل بشكل صحيح، وده هيخلي في مشاكل صحية مزمنة بتضر القلب والكلى والدم والدماغ والعقل.

وحاجات تانية زي: تغيرات في المزاج، اكتئاب، قلق، ضعف في الذاكرة والتركيز، زيادة في الوزن، ارتفاع في ضغط الدم، أمراض مزمنة زي السكر والقلب وخطر الموت المبكر

النوم مش حاجة جانبية في الحياة، وتقول كفاية كام ساعة وهشرب قهوة وأفوق، النوم جزء كبير من حياتنا زي الأكل والشرب، حاول تنظم وقتك وتاخد كفايتك من النوم ويكون هو أولوية من الأولويات في يومك لإن لو النوم اتظبطت.. حاجات كتير هتتظبط.

Comments: