صورة عمرها 80 سنة حيرت العالم كله!

16/03/2021

في نوفمبر سنة 1940، تم اعادة افتتاح جسر ساوث فورك في كندا، الناس حضرت الحدث ده وكان في ناس وصحافة بتصور.. الموضوع لحد هنا عادي، اللي مش عادي إن صورة من الصور واللي تم تداولها على الإنترنت في 2010 وفيها راجل يبدو من لبسه ومظهره إنه سافر بالزمن للحدث ده.

الصورة اتنشرت لأول مرة في 2004 في متحف "Bralorne-Pioneer" بعنوان "حياتهم في الماضي هنا" الموضوع كان مُحير والنظريات كترت ما بين إن الصورة اتعدل عليها بالفوتوشوب والدليل إن وقفة الراجل وسط الناس مش راكبة أوي، وناس تانية اتجهت إنه مسافر عبر الزمن بسبب مظهره والكاميرا اللي كانت في إيده.

خلينا في البداية نتفق إن الصورة حقيقية 100% ومحصلش عليها أي تعديل، طيب الراجل ده وصل إزاي في الصورة؟

موقع Snopes وده موقع متخصص في تحقق من الروايات المنتشرة سواء بالتأكيد على صحتها أو بنفيها، الموقع ده نشر إن الصورة حقيقية ومفيش أي تلاعب، وبيجاوب على سؤالنا: ليه شكله غريب عن باقي الناس اللي واقف وسطهم؟ الموضوع ده هيتلخص في 3 حاجات في الصورة.

التيشرت ده كان بيلبسه فريق مونتريال للهوكي، من سنة 1924 لـ 1938

النظارات دي كانت موجودة في الأربعينيات ولكن مكنتش منتشرة.

الكاميرا اللي في الصورة كانت متوافرة في نفس الفترة، وشركة كوداك كانت بتصنع عدد كبير من الكاميرا الصغيرة المحمولة في الوقت ده.

في النهاية حابب أقول تفسير تاني، وهو إن اللي إدى للناس انطباع إن الراجل مش واقف في مكانه ولا عصره، فكرة إن لبسه كليا كان مختلف عن باقي الناس اللي كلهم كانوا لابسين "بدلة وكرفتة وقميص" ولو كل واحد لبسه مختلف في الصورة وسافر عبر الزمن.. إزاي محدش خد باله من الراجل ده اللي للوهلة الأولى يبدو إنه مش من عصر الأربعينيات!

Comments: