إيه حكاية لغة «السغة لمون» المنتشرة الأيام دي؟

18/03/2021

خلال الأيام اللي فاتت، ظهرت بوستات وميمز بلغة غريبة والناس كان لسان حالها "التريند ده غريب جدا!"

التريند أو اللغة الغريبة دي اسمها "السغة لمون" أو "سُغة لمبة"، وكان أول شخص اتكلم عن اللغة دي هو أحمد مكي لما نزل أغنية "وقفة ناصية زمان" 

وهي لغة ممكن الأجيال الجديدة مش عارفينها أو مش عارفين هي طلعت ليه!

اللغة دي تعتبر لغة شارع أو شفرة، كانت الناس بتتكلم بيها في الشارع عشان محدش يفهم كلامهم، وهي سهلة نوعا ما بس محتاجة تدريب عشان كل مرة تقدر تبدل الحروف!

الموضوع هو إنك بتشيل أول حرف من الكلمة وتستبدلها بحرف السين، والكلمة التانية تكون بتبدأ بأول حرف أنت شيلته من الأولى، وده اللي عمله أحمد مكي في الأغنية لما قال كوبليه: "ساسب حواب سفهم يتنيل ساجة حلات".

ولو جينا نفك شفرة الكوبلية دي ونشيل حرف السين في أول كل كلمة وناخد أول حرف في الكلمة اللي بعدها هتبقى "حاسب يفهم حاجة".

يعني الكلمة بكلمتين، لو هتقول اسم مثلا زي "أحمد" فا هتقول سحمد أرنب عشان اللي هيقرأ أو يسمع ياخد أول حرف في تاني كلمة ويحطه مكان السين في أول كلمة، وغالبا من هنا جات جملة "بيتكلم بالسين أو السيم" اللي هو بيقول كلام مش مفهوم.

وفي النهاية نحب نفكرك إنها مبقتش لغة سرية لإن مصر كلها فهمتها دلوقتي خلاص.

Comments: